"చిన్ని ఆశ"

వందంటే మాట(పా) లా?

2012-01-21T05:30:00.004-05:00

మా వాడికి లెఖ్ఖల్లో వందకి వంద, మా టెండూల్కర్ వంద వందలు (చేశాక లెండి), మా సినిమా వందరోజుల విజయోత్సాహం, మాధిక్కారం [సంధి కలిపి పొందిగ్గా కాస్త కారం దట్టించాం...బాగు(ంటు)ందని. అదే 'మా అధి కారం' అని విడగొట్టి చదువుకోండి ;) ] వంద రోజులు గద్దెపై....ఇలా అందరూ వంద(అ)ని గర్వంగా సెలెబ్రేట్ చేసేసుకుంటుంటే బ్లాగ్ లోకంలో మనమూ మన వంద రచనలనీ గుర్తించి ఘనంగా చేసుకోవద్దూ మరి...

అప్పుడే వంద మాట(పా)ల మూటలు మా "చిన్ని ఆశ" లో రాశామా అనుకుంటే మాకే ఎంతో ఆశ్చర్యం వేసింది. అందుకే ఇలా ఈ స్పెషల్ పో(స్టర్) స్ట్ తో మీ అందరితోనూ సెలబ్రేట్ చేసుకుంటున్నాం.

చిన్ని గుండెల్లో ఆ "చిన్ని ఆశ" ఫలించేనా? అంటూ మా మొదటి పోస్ట్ రాసి ఇప్పటికి 516 రోజులు. ఈ 516 రోజుల్లో 101 పోస్ట్ లు. అంకెల్లో మా భావాలని కొలవాలని ప్రయత్నిస్తే ప్రతి 5 రోజులకీ ఒక పోస్ట్, అందులో 25 పోస్ట్ లకి పదాల కూర్పుతో బాటు రంగు రంగుల గీతల చేర్పూ చేసే ప్రయత్నాలు. మా వందవ పోస్ట్ "చిత్రించా చెలీ" నా మనోఫలకం పై నిను శాశ్వతంగా... అంటూ పండు తన ప్రాణమైన చిట్టి ని మనసారా మాటల్లో, గీతల్లో, రంగుల్లో చిత్రించుకుంటూ చెప్పుకునే ప్రేమ భావం.

చిట్టి, పండు లాంటి ప్రేమ హృదయాలు ఎన్నో ఈ ఇలలో ఉంటాయి. నిత్యం ఆ ప్రేమ హృదయాలు ఎన్నెన్నో భావాలతో ఆలోచిస్తూనే ఉంటాయి. ఆ హృదయ భావాలు చెప్పకనే ఒకదానికొకటి చేరిపోతుంటాయి. ఆ గుండెలు ఆ భావాలకి స్పందిస్తూనే ఉంటాయి. ఒకదాని కోసం ఒకటి ఎప్పటికీ తపిస్తూనే ఉంటాయి. అలాంటి హృదయాల "చిన్ని ఆశలు" ఫలించాలి అన్న చిన్ని ఆలోచనకి మేమివ్వాలని చేస్తున్న ఈ చిన్ని ప్రయత్నమే మా "చిన్ని ఆశ".

"పండూ మనమూ మన భావాల్ని బ్లాగ్ రూపంలో రాయొచ్చుగా, అందరితోనూ పంచుకోవచ్చుగా..." అని 'చిట్టి' ముద్దుగా 'పండు' ని అడిగినపుడు, పండు అవును కదా అని, వెంటనే...మరి ఏం రాద్దాం...పేరేం పెడదాం...అన్నపుడు మా 'చిట్టి' చిన్ని బుర్రకి తట్టిన గొప్ప ఆలోచనే "చిన్ని ఆశ". అలా పుట్టిన మా ఈ "చిన్ని ఆశ" బ్లాగ్ లోకంలోకి బుడి బుడి నడకలతో ప్రవేశించింది. క్రమేపీ మా భావగీ(త)తికలకు మా 'చిట్టి' ప్రోత్సాహంతో ఉత్సాహంగా గీతవర్ణాల రూపమూ ఇవ్వటం మొదలెట్టాం. మా ప్రతి పోస్ట్ కీ స్పందిస్తూ మమ్మల్ని ఉత్సాహపరుస్తూ, తమ అభిప్రాయాలను మాతో పంచుకుంటూ ముందుకి నడిపిస్తున్న మా పాఠకులందరికీ, తోటి బ్లాగర్లకీ ఈ సందర్భంగా "ధన్యవాదాలు".

రెగ్యులర్ గా మా భావాలకి స్పందిస్తూ మాకెంతో ఉత్సాహాన్నిస్తున్న కల్లూరి శైలబాల గారు, రస జ్ఞ గారు, పల్లా కొండల రావు గారు, వేణూ శ్రీకాంత్ గారు, సుభ గారు, జిలేబి గారు, మధుర వాణి గారు, శోభ గారు, జయ గారు, వల్లి గారు, చిన్ని గారు, పద్మార్పిత గారు, జ్యోతిర్మయి గారు, వనజవనమాలి గారు, జ్యోతి గారు, మాలాకుమార్ గారు, లక్ష్మిరాఘవ గారు, ప్రవీణ గారు, నందు గారు, Indian Minerva, నెలబాలుడు గారు, C.ఉమాదేవి గారు, మాధవ రావు పబ్బరాజు గారు, శశి కళ గారు, తెలుగు పాటలు, చెప్పాలంటే, బెల్లంకొండ లోకేష్ శ్రీకాంత్ గారు, రాజి గారు, ఫణి గారు, సందీప్ గారు...ఇలా పేరు పేరునా...ఎందరో...ఎందరెందరో. ఇందులో చాలా మంది ఇప్పటికే తమ భావాలతో, చిత్ర, పద కూర్పులతో బ్లాగ్ రీడర్లకి సుపరిచయం.

మా భావాలకీ, బొమ్మలకీ స్పందించిన ప్రతి ఒక్కరికీ పేరు పేరునా మా "ప్రత్యేక ధన్యవాదాలు".

-మీ చిట్టి, పండు

..♥♥..

"చిత్రించా చెలీ" నా మనోఫలకం పై నిను శాశ్వతంగా...

2012-01-16T17:30:00.001-05:00

"వేకువ వెలుతురు నింగిని చీల్చుకుంటూ నేలపై పరచుకుంటున్న ఓ ప్రశాంత ఉదయం
వికసించెను మదిలో అనునిత్యం నేనున్నానంటూ నీడై కదలాడే చెలి సుందర వదనం

మెరిసి మాయమయె కన్నుల ఎదుట అందమైన ఆ దివ్య రంగుల కుసుమ సోయగం
నలుదిక్కుల మది వెతకసాగె హృది మీటి అదృశ్యమయిన ఆ పసిడి ప్రతిబింబం కోసం

అంతట సన్నగ వీచె మది మధుర వనాన చెలి రూపం చిత్రించాలన్న కోరికల పవనం
మదిన దాగిన ఆ రూపం అందంగా చిత్రించాలని కలిగెను మనసున ఎనలేని ఉత్సాహం

మేమూ చెలి చిత్రంలో విలీనమయెదమంటూ తరలివచ్చె మా చిన్ని స్నేహ సమూహం
నీలవర్ణం వెనక నేనై చెలి బంగరు మేని వన్నెను ప్రకాశింపజేస్తా అని దిగివచ్చె నీలాకాశం

ఎర్రని సింధూరతిలకం నుదుటిన నేనయ్యెదనని వేంచేసెను వెచ్చని సూర్యోదయ కిరణం
ఆభరణమై మెడవంపున మెరిసి మురిసెదమంటూ వచ్చి చేరెను ఆ చంద్రలోకతారార్కం

మేని సోయగాలను తాకే తెల్లని పట్టు చీర అయ్యెదనని వచ్చె మరుమల్లియ తెల్లదనం
చీర అంచున పొందికగా ఒదిగెదమంటూ కదలి వచ్చె ఇంద్రధనుసున సప్తవర్ణ మిళితం

మా పచ్చదనంతో మరింత నిండుదనం తెచ్చెదమని వచ్చి వాలెను చిలుకల ద్వయం
కురులకు నలుపుగ నన్నద్దుము అంటూ కమ్ముకు వచ్చె నిశీధ కారుచీకటి నల్లదనం

చుక్కల లోకంలో చెలిని నాపై గర్వంగా విహరింపజేసెదనని వచ్చిచేరెనో శ్వేతాశ్వం
కలకాలం ప్రియ పరిమళ కాంతులతో శోభిల్లుదునని కళ్ళముందు నిలిచె చెలి రూపం

ఆ చిత్రం జన్మజన్మలకూ చెదరక తనలో నింపుకుందునని సిద్ధమయె నా మనోఫలకం
రంగుల మిశ్రమాన నెచ్చెలి గురుతుగ నేనూ కరిగెదనని జాలువారెనో ఆనంద భాష్పం..."

-మీ చిట్టి, పండు
..♥♥..

"చిట్టి" సంబరాలు...

2012-01-08T21:45:00.005-05:00

"నువ్వొచ్చేస్తున్నావని మన తోటంతా మళ్ళీ నవ వసంతం నిండుకుంటోంది
నీకు ఎదురేగి స్వాగతం పలకాలని మన గులాబీ మొన్నే మొగ్గలు తొడిగింది

ఇన్నిరోజులూ ముద్దబంతి తన నవ్వులు నీతోనే పంచుకోవాలనే దాచి ఉంచింది
పూయని చిట్టి చేమంతి కొత్త రంగులు సంతరించి విరబూయటం మొదలెట్టింది

నువులేక పరిమళించనని అలక పానుపెక్కిన మరుమల్లె గుభాళించ సాగింది
చిన్నబోయి అక్కడే ఆగిపోయిన సన్నజాజి తీగ నీకోసం పందిరినల్ల సాగింది

విరియని మందారం తన మోమున సిగ్గు దొంతరలు దాచి విచ్చుకుంటోంది
నిత్యం ఈ నేలపై తిరుగాడే నీ పాద స్పర్శకై లేత పచ్చిక పరుచుకుంటోంది

మన చిలుక అదుగదుగో చిట్టి అని తిరుగుతు మాటిమాటికీ సందడి చేస్తోంది
నీ రాకతొ మా "చిట్టి సంబరాలు" కోసం నింగిన నిండు జాబిలీ తొంగి చూస్తోంది

మాయమైన గడియారం ముల్లూ వచ్చి నా గుండె వేగంతో పోటీ పడుతోంది
నిశ్శబ్ధంలో మూగబోయిన నా హృదయం మళ్ళీ కొత్త రాగాలు ఆలపిస్తోంది"

-మీ చిట్టి, పండు
..♥♥..

ఇన్ని రోజులా...ఇలా ఒంటరిలా...

2012-01-07T09:06:00.001-05:00

"నిన్నొదలి ఒక్కరోజైనా ఉండలేని నన్ను ఒంటరి చేసెళ్ళావ్...ఇన్ని రోజులా
నిన్నే మదిలో తలచుకుంటూ క్షణమో యుగంలా గడిపేశా...ఎలాగోలా
రేపు నువ్వొచ్చేస్తావని ఈరోజంతా నా కనులు రెప్పపడనంటున్నాయి...ఎలా
నువ్వొచ్చేస్తున్నావన్న సంబరంలో పొద్దున మర్చిపోయాను...అన్నీ మరలా
నువు లేక నిజంగానే ఇన్నిరోజులు గడపగలిగానా ఇది నిజమేనా...లేక కలా
మళ్ళీ నన్నిలా ఒంటరిగా వదలి ఎక్కడికీ వెళ్ళవుగా ఇక...ఎన్నడూ ఇలా
నవ్వుతు నువు తెచ్చే నవ్వుల వసంతంకై ఎదురుచూస్తున్నా...నే కోయిలలా"

-మీ చిట్టి, పండు
..♥♥..

అవగలవా సమస్తం...

2012-01-03T22:00:00.001-05:00

"ప్రతి నిమిషం నా ప్రాణంగానే అనిపిస్తావు
నాలో ఇమిడిపోయి అన్నిటా అగుపిస్తావు

నువు లేవని కాలం ఆగక వెళ్ళి పోయినా
నువ్వున్నావని మనసు ఉప్పొంగిపోయినా

వెళ్ళిన కాలం వెనుక నువ్వొదలిన జ్ఞాపకాలే
ఉప్పొంగే మనసు ఎదుట నిన్నొదలని ఆశలే

ప్రాణంలో ప్రాణమై నువు నాలోనే ఉండగ
నువులేవని అనలేను ఈ గుండెకి తోడుగ

ఈ జన్మకి నాలో ప్రాణమైన ఓ నా నేస్తం
మరిన్ని జన్మలకీ అవగలవా నా సమస్తం ..."

-మీ చిట్టి, పండు
..♥♥..

నూతన "శుభప్రద" ఆకాంక్షలతో "2012" కి సుస్వాగతం...

2011-12-31T13:30:00.009-05:00

"నూతనం"
అంటేనే ఎవరికైనా మనసున ఉత్సాహం నిండుకుంటుంది. ప్రతి ఉదయమూ నూతనమే, అయినా అది రోజూ వచ్చే ఉదయంలానే అనిపిస్తుంది. అందులో నూతనం ఏముంది...నిన్నటి సూర్యుడే, చుట్టూ నిన్నటి ఆ మనుషులే, ఆ పరిసరాలే...ఎప్పుడైనా ఎవరై నా కొత్తవాళ్ళు మనింటికి వచ్చినా, కొత్త ప్రదేశాలకి మనమెళ్ళినా ఆ రోజేదో నూతనంగా అనిపిస్తుంది. లేదంటే మళ్ళీ షరా మామూలే...రోజూ రొటీన్...పని, పని, పనీ...

మరి నేడో...నిన్నటి ఆ ఉదయమే, ఆ మనుషులే, ఆ పరిసరాలే...అయినా ఏదో నూతనత్వం మది బయటా, లోపలా, ప్రతిఒక్కరిలోనూ...

అదే ఈనాటి ప్రత్యేకం...
నూతనం...

నూతనత్వం...

"నూతన సంవత్సరం"

కొత్త సంవత్సరం మన జీవితంలో అడుగిడుతుందంటేనే ఎక్కడలేని ఉత్సాహమూ వచ్చేస్తుంది కదూ అందరిలోనూ! అది చెయ్యాలీ, ఇది చెయ్యాలీ, అలా ఉండాలీ, ఇది సాధించాలీ...అనుకుంటూ ఎన్నో కొత్త కొత్త రిజల్యూషన్స్ మన లిస్ట్ లో చటుక్కున చేరిపోతాయి. జీవితంలో పాతదై వెనక్కెళ్ళిపోతున్న 'పాత' సంవత్సరానికి వీడ్కోలు చెబుతూ 'కొత్త' సంవత్సరాన్ని సంతోష, సగర్వ, సాదర,స్వాగతాలతో ఆహ్వానిస్తూ నూతనోత్సాహం ఉరకలు వేసే ఆ క్షణాన ప్రపంచం అంతా సందడిగా జరుపుకునే ఏకైక పండుగ ఇదొక్కటే కదూ!

"గత కాలంలో కలసి పోయే నిన్న

గుండె జ్ఞాపకాల్లో ఎన్నటికీ మిన్న

నిన్న పోయినా నేనున్నాననే రేపు

మదిలో మరలా చిగురాశలు రేపు

నిన్న మెదిలే జ్ఞాపకాల స్వగతం
రేపు మదిలో ఆనందాల స్వాగతం"

ఈ నూతన సంవత్సరం అందరి జీవితాల్లోనూ శుభప్రదాయకం అవ్వాలని ఆకాంక్షిస్తూ,

నూతన "శుభప్రద" ఆకాంక్షలతో...

నూతన సంవత్సర శుభాకాంక్షలతో "2012" కి సుస్వాగతం...

-మీ చిట్టి, పండు

..♥♥..

పరిగెత్తుకుని వచ్చేస్తాగా...

2011-12-25T17:30:00.014-05:00

ప్రియమైన "నా ప్రియ" నేస్తానికి,
ప్రేమతో "నీ చిట్టి"
పండూ! ఎలా ఉన్నావు...బాగున్నావా...ఒక్కరోజుకే నా మీద ఇంత బెంగ అయితే ఎలా కన్నా?

హ్ మ్...అదుగదుగో, నాక్కనిపిస్తుందిలే నీ ముఖం...కనుబొమ్మలు చిట్లించి చెప్పలేని ఆ సహనాన్ని నువు దాస్తున్నా...ఆ కళ్ళు నాతో మాట్లాడేస్తున్నాయ్...ఆ ఎలా ఉంటానూ, నీకు తెలీదా? ఒక్కడినే వదిలేసి వెళ్ళి పొయావ్ గా...అంటూ నన్నడుగుతున్నాయ్...ఏం చెయ్యను పండూ! వెళ్ళక తప్పిందికాదు నాన్నా! నాకు మాత్రం నిన్నొక్కడినే వదలి వెళ్ళాలని ఉంటుందా, చెప్పు? నిన్నొదలి రాలేక వచ్చానన్న మాటే గానీ నువ్వన్నట్టే అనిపిస్తుంది...ఎంటీ అంటున్నావా? అదేనోయ్, వెళ్ళేముందు నువ్వన్నావ్ గా? వెళ్ళు వెళ్ళు వెళ్ళిన తర్వాత నన్ను తల్చుకుని నువ్వే బాగా దిగులు పడ్తావ్ అని, అక్షరాలా అదే...చాలా దిగులుగా ఉందిరా కన్నయ్యా!

అయినా పండూ! ప్రేమంటే 24 గంటలూ ఒకరి దగ్గర ఒకరు కళ్ళల్లోకి చూస్తూ ఉండటం కాదంట...రోజులో 23 గంటలూ ఎంత కష్టమైన పనులన్నా చేసి మిగిలిన ఆ ఒక్క గంటలో నీ ఆలోచనలో నీ తలపులతో నిన్ను తలచుకుంటూ అన్ని గంటల శ్రమనీ ఇట్టే మర్చిపోవటమేనంటోయ్ ప్రేమంటే...
హ్ మ్...ఎవరో గానీ ఇలాటివి బానే చెప్తారు...అన్నావా? వినిపించిందీ చిట్టి మదికి...అనుకున్నా అంటావని...
దూరాన ఉన్నా నీ ఆ"రాధ"నే కదరా! పండూ, నువ్వలా దిగులుగా రాస్తే నాకూ చాలా దిగులేస్తది.

చూడు, రోజూ...ఏం చేస్తున్నావో, ఎలా ఉన్నావో అని ఒకటే ఆలోచన. కానీ అంతలోనే మళ్ళీ ధైర్యం. ఎందుకో తెలుసా? అన్ని జాగ్రత్తలూ చెప్పే వచ్చా కదా! ఏనాడూ నేనేదైనా ఒక్కసారి చెప్పాక, నేను మర్చిపొయినా నా పండు ఎన్నటికీ మరువడు, చక్కగా కుదురుగా అన్నీ చెప్పినట్టే చేస్తాడు అని నీ "చిట్టి" ధీమా...ఎందుకోయ్ అంత ధీమా...అంటున్నావా? నీగురించి నాక్కాక ఇంకెవరికోయ్ బాగా తెలుసూ?

అయినా దిగులెందుకు చెప్పు...తొందరగా వచ్చెయ్యనూ...నీ చుట్టూ చూసుకున్నావా సరిగా, నేను నీ దగ్గర లేనని ఎవరన్నారు? కళ్ళు తెరవగనే చిట్టీ అని పిలుస్తావా? అప్పుడు నీ తలపుల్లో నీ పక్కనే లేనూ...కాఫీ తాగుతూ మన మొక్కలు చూస్తూ చిట్ట్తీ చూడు ఈ గులబీ ఎన్ని మొగ్గలేసిందో లెక్క బెట్టు అన్లేదూ, నువ్వు ఆలోచిస్తూ లెక్కలుపెట్టే చుక్కల లెక్క తప్పితే 'ఊప్స్ చిట్టీ' అనటం నేను విన్లేదనుకున్నావా?...హ్ మ్ ఈ ఒక్క కీస్ తోనె నీకూ నాకూ గొడవ, ఎప్పుడూ మర్చిపోతావు కదా...సర్లె సర్లె అంటున్నావా? ఓయ్ లంచ్ పాక్ చేసుకుంటున్నావా రోజూ లేదా ఊరికే అంటున్నావా? పండూ! నిన్ను చూస్తే నాకెంత ముచ్చటో, చక్కగా బద్ధకించకుండా, అన్నీ సర్దుకుని, బాక్స్ లో పెట్టుకుని బుద్ధిమంతుడిలా 'స్టార్ట్ అవుతున్నా చిట్టీ' అంటూ వెళ్తావు. రాముడు మంచి బాలుడు, అది అందరికీ తెలిసిందే. పెద్ద గొప్ప! "నా పండు మంచి బాలుడు", అదీ నాకు గొప్ప.

పండూ! టైం కి తింటున్నావు గా? నేను లేనని ఇంటికి లేట్ గా రాకు. తొందరగా వచ్చేసి రెస్ట్ తీసుకుని బోల్డు బొమ్మలెయ్యి. చూడు నీ బొమ్మలకి ఈ మధ్య బోల్డు అభిమానులు, కదూ! కానీ నువు, చిట్టీ ఈ బొమ్మలన్నీ నీ కోసమే అంటే నాకెంత సంబరమో! ఓయ్ నేనూ నీకన్నా బాగా బొమ్మలేస్తాను తెలుసా, నువ్వొప్పుకోకపోయినా సరే నేనేస్తా అంతే...అప్పుడోసారి నిన్ను కూర్చోబెట్టి నీ పేద్ద బొమ్మెయ్యలేదూ! అంతా అయ్యాక చూసి నువ్వేమన్నావ్ గుర్తుందా? హ్ మ్...పెద్ద గొప్పలే...నువ్వేమంటున్నావో నాకు తెల్సు...వెయ్యటం అనరు చిట్టీ...గియ్యటం...ఓయ్, మొన్నేమన్నావూ? నేనొచ్చేసరికి అప్పుడు నేనడిగిన బొమ్మేసి రెడీ గా ఉంచుతానని చెప్పావా...మొదలు పెట్టావా అసలు, లేదా చుక్కలు లెక్క పెడుతూ ఆ ముల్లు లేని గడియారం వంక అలా చూస్తూనే ఉన్నావా? ఇంతకీ అందులో ముళ్ళేమయ్యావనుకున్నావ్? నేనే తీసుకెళ్ళా పండూ...నేనెళ్ళాక అవెలాగూ తిరగవు కదాని...నాతో తీసుకొచ్చేస్తాగా, అప్పుడు మళ్ళీ గిర్రున తిరిగిపోతాయి.

పండూ! నువ్వింకా బోల్డ్ బొమ్మలేసి పేద్ద ఆర్టిస్ట్ వైపోతే చూస్తూ చెమర్చిన కన్నులతో ఆనందంగా నిన్ను చూసుకోవాలనుందిరా!
మనసున క్షణమైనా నిను వీడక ఉన్నా పండూ! దిగులు పడొద్దు నాన్నా...తొందరగా పరిగేత్తుకుని నీ దగ్గరకు వచ్చేస్తాగా...
బోల్డ్ అంటే బోల్డు ప్రేమతో
నీ ప్రియనేస్తం
నీ "చిట్టి"

-మీ చిట్టి, పండు

..♥♥..

నువు లే(వ)ని ఒక్క రోజుకే...

2011-12-23T17:30:00.003-05:00

ప్రియతమా,

నిన్నొదలి ఒక్క క్షణమైనా ఉండలేను అన్నాననా, నన్నిలా ఒంటరిగా వదలి ఇన్ని రోజులు ఊరెళ్ళిపోయావు? నువు లేక చూడు తెలవారకముందే కనులు తెరిచినా మనసు నిన్నే ఆలోచిస్తూ బారెడు పొద్దెక్కేదాకా మంచం దిగనంటోంది. రోజూ లేచే సరికి "గుడ్ మార్నింగ్" అని చెప్తూ నవ్వుతు పలకరించే నీ మాటేదీ, కిల కిల మని వినిపించే ఆ నవ్వేదీ, నా కళ్ళల్లో వికసించే నీ రూపం ఏదీ, తెలవారగనే కిటికీలోంచి రివ్వున దూసుకు వచ్చే ఉదయ భానుడి కిరణాల్లోంచి వచ్చి నను తాకే నులువెచ్చని నీ స్పర్శేదీ.

పొద్దున ఆఫీస్ కెళ్తూ నిన్నే తలచుకున్నాను. రోజూ...లంచ్ పెట్టుకున్నావా, బ్రేక్ ఫాస్ట్ చేశావా, కార్ కీస్ మర్చిపోకు, వాలెట్ చూసుకో, మరీ ఎక్కువ పని చేసి అలసిపోకు, టైం కి లంచ్ తిను...అంటూ అన్నీ నువ్వై చూసుకునే నా నువ్వు ఈరోజు నాతో లేకపోయినా నువ్వున్నట్టే ఒకటికి రెండు సార్లు అన్నీ చూసుకుని భారంగా ఆఫీస్ కెళ్ళాను. వెళ్ళానన్న మాటే కానీ మనసు రానంటూ నీ దగ్గరే ఉండిపోయింది. నువ్వెలా ఉన్నావో, ఏం చేస్తున్నావో అనుకుంటూ నిను తల్చుకుంటూనే ఉంది. లంచ్ టైం కి నిన్నే తలచుకున్నాను. ఆకలి లేకున్నా తినకుంటే నువు కోప్పడతావని తిన్నాను. నేనెక్కడున్నా సరిగా తింటున్నానో లేదో అని పూట పూటకీ ఆలోచించే నీ మది నాతో కలసి ఉంటే నాకిక దిగులెందుకు చెప్పు?

అలసిపోయి సాయంత్రం ఇంటికి వచ్చే వేళ రోజూ నీ స్వరం విని అలసట మరచిపోయే నేను ఈ రోజు వినబడక భారంగా కనులు మూసుకుంటే నా కళ్ళల్లో నీ రూపం కన్నీరై కరగ సాగింది. నీరసంగా ఇంటికొచ్చి దిక్కుతోచక అలా మంచంపై వాలిపోయాను. దిగులుపడ్డ మనసుని సముదాయించే ప్రయత్నం చెయ్యలేకపోయాను. ఆలోచనలు నీ చుట్టూనే సుడులు తిరుగుతూ నను చుట్టుముట్టేశాయి. నువ్వున్నపుడు సంతోషంగా ఉత్సాహంగా అలసట ఎరుగక ఉరకలు తీసే ఈ గుండె ఇప్పుడెందుకిలా రోదిస్తుంది. కొద్ది రోజులేగా? మళ్ళీ నవ్వుతు నాకోసం తిరిగి వచ్చేస్తావు అని తెలిసినా ఎందుకిలా ఆవేదన పడుతోంది?

నువు వెళ్తూ చెప్పెళ్ళిన జాగ్రత్తలు ఏవీ ఈరోజు నేను మరవలేదు. ప్రతి పనిలో, నా ప్రతి కదలికలో నిన్నే తలచుకున్నాను. నాకన్నీ నువ్వే అయి చూసుకునే నా నువు నాతో ఉన్నావని రోజూ ఉప్పొంగిపోయే ఈ హృదయం నీ తలపులనే నీ మాటలుగా గుర్తుచేసుకుంటూ నువ్వున్నట్టే అనుకుంటూ దిగులుగా ఉంది. పడుకునే వేళకి దుప్పటి కప్పుతు "గుడ్ నైట్" అని చెప్తూ నా నుదుటుని తాకే ఆ మృదువైన లాలన లేక నా కన్నులు మూత పడనంటున్నాయి. నిద్దురలోనూ కమ్మని కలవై తోడుగ ఉండే నువ్వు, ఈ రోజు నిద్దురలేని చీకటి ఘడియన నా వద్దన చేరి నా కన్నులలో కలవై ఎలా ఒదిగిపోగలవు?

నువ్వున్నపుడు ఎందుకిలా పరిగెడుతోందీ అనిపించే కాలం, నువు లేనపుడెందుకిలా కదలనంటూ మొరాయించేసింది. అసలీ గడియారంకి ముల్లులున్నాయా అని పదే పదే చూసుకుంటూనే ఉన్నాను. నువ్వెళ్ళి ఇంకా ఒక్క రోజైనా కాలేదు, చూడు అప్పుడే ఎన్నోరోజులైనట్టు లెక్కలు మొదలెట్టాను. క్షణమైనా కదలని కాలంతో ప్రతి నిమిషమూ ఎందుకు నాకీ సమరం?

నువు లేని ఈ ఒంటరి తనంతో నన్ను మరింత ఒంటరిని చేసి ఇంకెపుడూ నను వీడి వెళ్ళవుకదూ?
నువు లేక కదలని క్షణాలని లెక్కిస్తూ ...

నీ రాకకోసం నువ్వెళ్ళిన మరుక్షణం నుంచీ ప్రతిక్షణం ఎదురుచూస్తూ...

- నీ
"ప్రియమైన నేను"

-మీ చిట్టి, పండు

..♥♥..

బ్రతుకున అతుకు సాధ్యమా

2011-12-22T17:30:00.002-05:00

"కలసి నడవాల్సిన జీవన దారులు వేరైపోతే
కనుచూపు మేరనంతా కారు చీకటే అయితే
ఎక్కడికీ గమ్యం తెలియని బ్రతుకు పయనం
ఎందులకీ శృతీ గతీ తప్పిన జీవన సమరం

కానరాని బాటన ఎదురై వెళుతూ కనిపిస్తావనా
చీకటి మాటున చిరుదీపమై వెలుగులు తెస్తావనా
కలలుగన్న మనసున ఆశలు నువ్వై తీరుస్తావనా
నాతో రాని గతంలో రేపై నా పక్కన నిలుస్తావనా

నీకోసం వగచిన ఈ గుండెని శోధించి చూసినా
జన్మంతా దక్కిందీ ఆరని ఆ కన్నీటి ధారలేనా
అందరాని మరో లోకానికి తరలి నేనెళ్ళిపోయినా
చిరిగిన బ్రతుకున అతుకు నీకైనా సాధ్యమగునా"

-మీ చిట్టి, పండు
..♥♥..

మన "బాపు" గారికి పుట్టినరోజు శుభాకాంక్షలు...

2011-12-14T22:50:00.002-05:00

"బాపు" గారి గురించి తెలియని తెలుగు వారుండరు. ప్రతి తెలుగు వారూ...బాలలూ, పెద్దలూ, వృద్ధులూ, ముఖ్యంగా ఆడపిల్లలు తమల్ని ఆయన బొమ్మల్లో ఎన్నిటిలోనో చూసుకోగల లెక్కలేనన్ని తెలుగుదనం ఉట్టిపడే బొమ్మలు బాపు గారు గీశారు. ఎందరో ఆర్టిస్ట్ లకు స్ఫూర్తి అయిన ఆయన ఈనాటికీ ఉదయాన్నే లేచి బొమ్మలు సాధన చేస్తారంటే ఆశ్చర్యం కలగక పోదు.

ఆయన జన్మదినం ఈరోజు. మా "చిన్ని ఆశ" తరపున ఆయనకి "జన్మదిన శుభాకాంక్షలు" చెప్తూ భగవంతుడు ఆయనకి ఆయురారోగ్య ఐశ్వర్యాలు ఇవ్వాలని ప్రార్ధిస్తున్నాము.

మా "చిన్ని ఆశ" కీ ఆయన ప్రొఫైల్ బొమ్మ ఎప్పుడో మాకోసమే అన్నట్టు వేసి పెట్టారు.

మా బొమ్మలే కాదండోయ్! ప్రతి తెలుగు వారి బొమ్మా ఆయన ఎప్పుడో గీసి పెట్టారు, ఆయన బొమ్మల్లో మిమ్మల్ని వెతికి చూసుకోండి, తప్పక మీ బొమ్మా ఎక్కడో దాగి ఉంటుంది. అందుకే ఆయన మన తెలుగు వారికి "అందరి వాడు".

-మీ చిట్టి, పండు

..♥♥..

నిన్నా నేడూ రేపూ...నువ్వే

2011-12-10T17:30:00.001-05:00

"నిన్న కరిగిపోయిన అందని జ్ఞాపకం
రేపు కమ్మని ఆశల ఊహా గగనం
నేడా జ్ఞాపకాల ఆశని కలిపే నిజం
నిన్న నేడు రేపుల కలయికే జీవితం

కరిగిన నిన్నటిలో చెరగని
జ్ఞాపకం అందని మన ప్రేమ

రేపటి ఆశల ఊహల్లో కమ్మని
ఆశాభావం అందలాన మన ప్రేమ

నేడు మదిలో చిగురించే తియ్యని
జ్ఞాపక రూపం అందమైన మన ప్రేమ

నిన్నటి జ్ఞాపకంలో అందని నా నువ్వే
రేపటి ఆశలఊహల అందలాల్లో నువ్వే
నేటి తియ్యని ప్రేమలో అందమైన నువ్వే
నిన్నా, నేడూ, రేపూ నువ్వే నా నువ్వే "

-మీ చిట్టి, పండు
..♥♥..

నీ ఆ"రాధ"నే రా...కృష్ణా

2011-12-08T17:30:00.002-05:00

కృష్ణా...
నే లేనని ఈ పువ్వుల తెమ్మెరపై అలక నీకేలరా
నే రానని మన బృందావనాన్నీ కాంచకుందువా
నీ చెంత లేనని ఆ మురళీగానం మూగబోదగునా

ఈ పువ్వుల నడుమ నడయాడిన నీ రాధను కనరా
మన బృందావనమున నీకై వేచిన నీ దానిని కదరా
ఆ మురళిన వినిపించే మధురాధాగానం నను తాకురా

నేనట లేకున్నా వాటన్నిట నా నిరీక్షణ గురుతులు లేవా
నీ వద్దకు రాకున్నా ఆ పరిసర మధురిమలలో నే లేనా
నా కృష్ణుడి ఒడిలో సేదతీర నీ రాధ నీకడ రాకుండునా

నేనెచటనున్నా నీ "ఆరాధనే" రా కృష్ణా
నీ ఆ "రాధ" నే రా కృష్ణా
నీ "రాధ"నే రా కృష్ణా...

-మీ చిట్టి, పండు
..♥♥..

కృష్ణా...నీ రాధను వీడి వెళ్ళకు రా...

2011-11-26T17:30:00.002-05:00

"కృష్ణా నీకై కన్నులు కాచేలా వేచి చూసే నీ రాధను రా
రారా కృష్ణా నీ మురళీగానం విన నా మది పిలిచెను రా

నీ రాకకై వేచే నను చూసి యమునన అలలూ నవ్వెను రా
నా అల్లరి కృష్ణుడు రానీ ఆ నవ్వుల నావనేనెక్కెదనంటిని రా

మబ్బుల మాటున జాబిలి నీరాకకై తొంగి తొంగి చూసెను రా
నా వెన్నెల కృష్ణుడు రానీ ఆ మబ్బుల చాటునెదాగెదవంటిని రా

చల్లని గాలీ నను తాకకనే మళ్ళీ వచ్చెదనంటూ వెడలెను రా
నా చల్లని కృష్ణుడు రానీ నా దరికైనను నినురానివనంటిని రా

ఓ జింకల జంటా నను కాంచి పక పకలాడుతు వెళ్ళెను రా
నా చిన్ని కృష్ణుడు రానీ మిము నేనూ వెక్కిరింతునంటిని రా

ఆ గిరులపై పారిజాత పరిమళం నీరాకలేక రానని అలిగెను రా
నా గిరిధర కృష్ణుడు రానీ నీ పరిమళం నాకేల రావద్దంటిని రా

అలనవ్వుల తాకిడి నను మరలా తాకక మునుపే కృష్ణా రా రా
మబ్బుల దాగిన జాబిలి వెలికి ముందే నా వెన్నెల కన్నా రా రా

అటు వెళ్ళిన చల్లని గాలి ఇటు వీచే లోపే చల్లని మురళీ రా రా
వెనుదిరిగే జింకల కంట నే నీ జంటనుండగ చిన్ని కృష్ణా రా రా

పారిజాత పరిమళం నీవెయై వచ్చే నా గిరిధర కృష్ణా రా రా
చిన్ని ముద్దుల కృష్ణా నీ రాధను వీడి ఇక ఎన్నడు వెళ్ళకు రా"

-మీ చిట్టి, పండు
..♥♥..

పరుగున రావా నేస్తమా...

2011-11-24T17:30:00.002-05:00

"నువు లేవని తెలిసినా ఆగక పాపం నా మది
ఉదయ వెలుగున నీకోసం మళ్ళీ వెదికి వెదికి
వెలుగు మలచిన నా నీడని కని నీవని తలచి
వెనుదిరిగె నను వదలని ఆ నీడన నిను చూచి

నువులేని నాకు సాగని కాలమె ఓ గగనమాయె
దిక్కుతోచని మనసున ఆలోచనలే నేస్తములాయె
కదలని కాలంతో మది దిగులుగ ముందుకిసాగె
నీ రాకాకై శూన్యం వెనుక ఒంటరిగ చూడసాగె

నీకై వేచిన నాకై చప్పున కదలి రావా ప్రాణామా
నా ఉనికి నిను తాకిన వెంటనె పరుగున నేస్తమా
ఒంటరి పయనం ఆపుతూ పక్కన నడిచే తోడుగా
చీకటి శూన్యం చీలుస్తూ రేపటి ఉదయకిరణంలా"

-మీ చిట్టి, పండు
..♥♥..

ఆద్యంతమూ హృద్యంతం...బాపూరమణ ల శ్రీరామరాజ్యం

2011-11-20T17:30:00.016-05:00

( ఇది మా చిన్ని గుండెల స్పందన మాత్రమే... చిత్ర సమీక్ష కాదు)

..♥♥..

తెలుగు తెర పౌరాణిక సినిమాలకు పుట్టినిల్లు. పౌరాణికాలను తెరకెక్కించటంలో తెలుగు డైరెక్టర్లు ఒకప్పుడు సిద్ధహస్తులు. మారుతున్న కాలంతో పాటు మారిన తెలుగు సినిమాలు, ఇప్పుడు పౌరాణిక సినిమా తీయటం పెద్ద సాహసం అన్నట్టుగా మార్చేశాయి. తీసినా చేసేవాళ్ళున్నారా, చేసినా చూసేవాళ్ళున్నారా అన్న ప్రశ్నలకి భయపడి ఆ సాహసం చేపట్టేవాళ్ళే కరువయ్యారు. ఆ సాహసం చేసిన ఈ సినిమా యూనిట్ అందరికీ మా "చిన్ని ఆశ" అభినందనలు.

దూకుడు మీదున్న ఇప్పటి తెలుగు సినిమా పర్వంలో ఈ "బాపు రమణ" ల దృశ్యకావ్యం అలనాటి "మాయా బజార్", "లవ కుశ" ల దరి చేరుతున్నదనటం అతిశయోక్తి కాదు. ఈ చిత్రం అద్భుతంగా రావటానికి కృషి చేసిన ప్రతి ఒక్కరూ అభినందనీయులే. శ్రీ బాపు గారు అంతటి మహాకావ్యం లో "లవ కుశ" ల ఘట్టాన్ని ఇప్పటి నటీనటులతో హృద్యంగా తెరకెక్కించటంలో ఒక చిత్రకారుడిగా ఆయన గీత ఎంత అందమైనదో, ఒక డైరెక్టర్ గా ఆయన ప్రతిభా అంత అందమైనదే అని నిరూపించుకున్నారు. ఇందులో అన్నీ అద్భుతాలే. ప్రతి ఫ్రేమూ మహాద్భుతమే. ఇందులో వేసిన సెట్టింగ్సూ, పరిమితి మించని గ్రాఫిక్సూ ఈ చిత్రానికి హైలెట్స్ అయ్యాయి. ఆద్యంతమూ వైభవంగా, అందంగా కన్నుల పండుగ చేస్తాయి.

సీతా రాముల ఎడబాటుని హృద్యంగా చూపించారు. చూసే ప్రతి హృదయాన్నీ కదిలించే లా మలచి చిత్రించారు. "చంద్ర వంక" ద్వారా సీతారాముల అనురాగాన్ని చూపిన వైనం అద్భుతం. తను లేని రాముడు తలపెట్టిన యాగం భార్య లేకుండా చేయటం అసాధ్యమని తెలుసుకున్న సీత వేదన, వాల్మీకి ద్వారా సీత అంతరాత్మ రాముడి మందిరం చేరి అక్కడున్న తన స్వర్ణప్రతిమని చూసి, దానికి చంద్రవంక దిద్దటం, రాముడి మనసది పసిగట్టి...సీతా సీతా...అంటూ బిగ్గరగా రోదించటం...బాపురమణలు చాలా అందమైన పొందిక ఈ సన్నివేశం. ప్రతి మనసునీ ఇది మెప్పించక మానదు.

తెలుగు ఆడపిల్ల అందానికి "బాపు బొమ్మ" పర్యాయ పదం. ఇందులో సీతనీ బాపు బొమ్మల్లో సీత అంత అందంగా ఆయన తీర్చి దిద్దారు. ఆయనలోని ప్రతిభకు ఈ సినిమా నిలువెత్తు తార్కాణం. పిల్లా, పెద్దా, దూకుడు మీదున్న ఇప్పటి తెలుగు యువతా చూడవలసిన అందమైన చిత్రకావ్యం.

లవకుశలకి తోడుగా హనుమ ని బాలరాజు గా ఇమిడ్చిన ముళ్ళపూడి గారి వైనం మరింత నిండు దనాన్నివ్చింది. ఇళయరాజా గారి వీనుల విందైన సంగీతం మరిన్ని కాలాలపాటు తెలుగువారిని అలరిస్తుంది. లవకుశలుగా నటించిన బాలల దగ్గరి నుంచీ, వాల్మీకిగా నటించిన మహానటుల వరకూ అందరూ బాపు గారి చేతుల్లో చక్కగా తీర్చిదిద్దబడ్డారు.

బాపురమణ ల కాంబినేషన్ లో ఆఖరి చిత్రం గా వాళ్ళ రామ భక్తి కి మెచ్చి ఆ శ్రీరాముడే వారితో చేయించిన మహా అద్భుతం ఇది. ప్రతి తెలుగు వారూ చూసి సగర్వంగా ఆనందించగల అద్భుత దృశ్యకావ్యం. తర తరాలకీ తెలుగు ప్రతిభని చాటి చెప్పే "సుందర కళా ఖండం", "చిత్ర రాజం" ఈ బాపురమణ ల ఈ శ్రీరామరాజ్యం..

-మీ చిట్టి, పండు

..♥♥..

కలసిపోనా ఆ గగనాన...

2011-11-18T17:30:00.003-05:00

♥... ... ... ...

"మది వీడని ఆలోచనల్లో
పెరిగే నీ తలపుల స్మరణ

పెరిగే స్మరణల్లో
తరగని నా గుండె ఆవేదన

తరగని ఆ వేదనలో
ఆగని కన్నీటి జడివాన

ఆగని కన్నీళ్ళలో
కరగని జ్ఞాపకాల ఘర్షణ

కరగని జ్ఞాపకాల్లో
గుర్తురాని గత మధురిమ

గుర్తురాని మధురిమలో
కనిపించని మన కలయిక

కనిపించని కలయికలో
వెదికే నీకై నిశీధ శోకాన

వెదికే నిశీధ శోకంలో
అంతులేని నీ జాడ

అంతులేని నీ జాడలో
సాగెను తుది పయనాన

సాగే తుది పయనంలో
కలసిపోనా ఆ గగనాన"
... ... ... ...♥
-మీ చిట్టి, పండు
..♥♥..
© చిన్ని ఆశ

రాగలవా నేస్తం

2011-11-12T17:30:00.002-05:00

♥... ... ... ...

నీ ధ్యాసలొ ప్రతి రేయీ
చీకటి రెప్పల మాటున కనుమూస్తున్నా

నీ రాకతో కలలో
కలత నిదురన లేచి నీకై వెదుకుతు ఉన్నా

నీ తలపుతో ఉదయం
కనులు తెరచి కొత్తగ జీవం పోసుకుంటున్నా

నీ పిలుపుతో ప్రపంచం
మరచి కాసేపైనా రోజూ నిజంగా జీవిస్తున్నా

నీ కోసం జీవితమంతా
ఎదురు చూపుల నిరీక్షణల్లోనే వేచి ఉన్నా

నాకోసం రాగలవా నేస్తం
నా తుది శ్వాస నను వీడి నిను చేరేలోపన్నా

... ... ... ...♥
© చిన్ని ఆశ
..♥♥..

-మీ చిట్టి, పండు

మెడ వంపున దాగిన చెలి కోమలం...

2011-10-30T17:30:00.002-04:00

♥... ... ... ...

"మెడ వంపుని తాకిన ఆ ముంగురులూ
మెడపై జాలువారిన ఆ వాలు జడా
నువ్వా నేనా ఎవరు గొప్పంటూ జగడమాడి
నన్నడగ 'అది చూడగనైనా నోచుకోలేని
నాకన్నా మీరిద్దరూ గొప్పే కదా' అన్నా

'హన్నన్నన్నా అంత మాటా ఆ మెడ వంపున
దాగిన చెలి కోమలం చూసిన కాదు తాకిన కాదు
చూడకనే తాకకనే అక్కడ వీణలు మీటే
నీ వెచ్చని తలపున చెలి కదలిన ఆ ఝామున
చూసి చిన్నబోయిన మేమా' అన విని నవ్వుకున్నా..."

... ... ... ...♥
..♥♥..

-మీ చిట్టి, పండు

దీపావళి శుభాకాంక్షలు

2011-10-25T17:30:00.002-04:00

♥... ... ... ...

"ఈ శుభ దీపావళి పండుగ

అందరి జీవితాన నిండుగ

ఆనందపు వెలుగులు నింపగ

పిల్లలు పెద్దలు అంతా సందడిగ

జరుపుకోవాలని ఎంతో హాయిగ"

దీపావళి శుభాకాంక్షలతో......

-మీ చిట్టి, పండు

ఎడారిలో వసంతముంటే...

2011-10-22T17:30:00.005-04:00

♥... ... ... ...

"కోయిల గొంతెత్తి పాడేది వసంతం దరిచేరాకే
పుడమి సొగసులు విచ్చేదీ ఆ వసంతం రాకకే
ఎడారిలో వసంతముంటే కోయిల గానం వినబడదా
పుడమి కరుణిస్తే వసంతం ఎడారిని సైతం తాకదా

ఎండి ఎడారైన బ్రతుకువనాన వసంతంలా విరిశావు
మూగబోయిన మది గొంతున రాగాలెన్నో పలికించావు
ఇపుడా వసంతాన విరబూసే ఆశల రంగుల కలలెన్నో
ఆ రంగుల్లో వినిపించే వసంత కోయిల మది గానాలెన్నో"

... ... ... ...♥
© చిన్ని ఆశ
..♥♥..

-మీ చిట్టి, పండు

బ్రతికే జీవితం...జీవించే ప్రేమ

2011-10-15T17:30:00.021-04:00

♥... ... ... ...

మూడు ముడుల కలయిక బంధం కావచ్చు

ఏడడుగుల బంధం బ్రతికినంత కాలం కావచ్చు

రెండు బ్రతుకుల కలయిక జీవితం కావచ్చు

రెండు జీవితాల కలయిక బాధ్యత కావచ్చు

బాధ్యతలో కష్టాలూ సుఖాలూ కలగవచ్చు

చివరికి బాధ్యతలు తీర్చి వెళ్ళిపోనూవచ్చు

కానీ రెండు గుండెల పరస్పర కలయిక ప్రేమ

రెండు మనసులు ఒక్కలా స్పందించటమే ప్రేమ

పక్కన లేకున్నా హృదయంలో జీవించేదే ప్రేమ

తనకోసం కష్టమైనా సుఖమేననుకొనేది ప్రేమ

తనతో మరణమైనా మధురమేనన్నది ప్రేమ

ప్రాణం విడినా మది వెన్నంటి ఉండేదే ప్రేమ

... ... ... ...♥
..♥♥..

-మీ చిట్టి, పండు

ప్రేమతో...

2011-10-12T17:30:00.004-04:00

ప్రియమైన "నా పండు" కి,

అత్యంత ప్రియంగా, ఇంకా ఎంతో ఇష్టంగా చాన్నాళ్ళకు మనసారా నీతో మాట్లాడాలని, మనసు విప్పి ఎన్నో చెప్పుకోవాలని
"నీ చిట్టి" రాస్తున్న ఉత్తరం.

చూడు పండూ! ఎంతగా మట్లాడుకున్నా చేత్తో పేపర్ మీద పెన్ తో ఇష్టంగా ఆలోచిస్తూ రాసుకుంటేనే మనిద్దరికీ ఎంతో ఇష్టం కదూ!

పండూ!
నీలో నాకు నచ్చే విషయమేంటో తెలుసా?(నచ్చనిది కూడా ఉందా? అని ప్రశ్నించకు)
- సున్నితమైన నీ మనసు.
చాలామంది, అమ్మాయిలకు మాత్రమే సున్నితమైన మనసూ ఆలోచనలూ ఉంటాయనుకుంటారు. కానీ నాకు తెలుసు, ఈ రోజుల్లో కూడా నువు మనసూ, మనుషులూ, బంధాలూ అంటూ ఎంతగా తాపత్రయపడతావో...అంతకంటే ఆర్ద్రంగా స్పందిస్తావని కూడా తెలుసు...అలాంటి నిష్కల్మషత్వం నీలో నాకు చాలా నచ్చింది పండూ! అదే నిన్ను నాకింత దగ్గర చేసింది.

పండూ!
ఒక్కోసారి నాకు చాలా బాధగానూ అని పిస్తుంది రా! చూడు ఎక్కడో చదివాను:
నిన్ను పొందకపోతే
ఎంత బాగుండేది నేస్తం
ఈ పొగొట్టుకోవటమనే
బాధ ఉండేది కాదు కదా....

అవునంటావా? నేను అస్సలు అలా అనుకోవట్లేదు. ఎందుకంటావా? ఎందుకో తెలుసా? అసలు నిన్ను పొందకపోతే ఈ జీవితానికి అర్ధమే లేదు. స్నేహాన్ని ఆస్వాదించేదాన్ని కాను. ప్రేమలోని మాధుర్యాన్నీ అనుభవించేదాన్ని కాను. ఇన్ని అనుభూతులు పంచుకున్నాము కనుకే దూరమైనా బాధలో కూడా ప్రతి క్షణమూ నీ ఆలోచనలే...అంటే నువ్వు నాతో ఉన్నట్టేగా? మరి దూరమెక్కడా? ఏంటో ఈ పిచ్చి మనసు ఒక్కోసారి ఏం కావాలో అర్ధం కాదు. తెలిసిందల్లా ఒక్కటే నా పండంటే నాకు బోల్డు అంటే బోల్డు ఇష్టమని.

పండూ!
గుర్తుందా ఏంకావాలి పండూ అంటే...

All I want is to grow old with you
to watch our life unfolded
our dreams one by one come true
All i want is to love you for ever

...మనసులోని భావాలను ఇంతకన్నా బాగా ఇంకేం చెప్పాలి పండూ!
ప్ర్రాణం కంటే ఎక్కువగా నిన్ను ప్రేమించటం తప్ప ఇంకేమివ్వగలను చెప్పు!

పండూ!
Do you know, what makes some people dearer is not just the happiness that we feel when we meet them, but the emptiness we feel when they are not around us.
How true is this? The same emptiness I feel when you are not around me.

ఇంకా రాయాలని చాలా ఉంది. ఎంటో మనసులో భావాలన్నీ గొంతుకడ్డం పడి కళ్ళలోంచి నీళ్ళు దూకుతున్నాయి

ఒంటరితనంతో జతకడుతూ ఎన్నాళ్ళిలా?
ఊహలకు ఊసులు చెప్పుకుంటూ ఎన్నేళ్ళిలా?
పొగుపడిన ఎన్నో భావాలని నీతో పంచుకోవాలనీ
కరిగిపొయిన క్షణాలని నీ సమక్షంలో పొందాలనీ
చెరిగి పొయిన చిరునవ్వుని నీ చెలిమిలో చిత్రించాలనీ...
ఎన్నెన్నో ఆశలు తెలుసా?

నీ జ్ఞాపకం తాలూకు ఫలితం ఈ క్షణం నా చెక్కిలి పై జారుతూ...
నీకోసం నిరీక్షించే

- నీ చిట్టి

Steve Jobs కి నివాళి

2011-10-05T20:22:00.006-04:00

Steve Jobs
1955-2011

The master mind behind Apple products ఇక లేరు.

Great people are born only once and never die.

ఆయన ఆత్మకి శాంతి కలగాలని ఆశిస్తూ...

-చిట్టి, పండు

నా చెలి "అపు"రూపం

2011-10-01T17:30:00.017-04:00

♥... ... ... ...

"మందారం కన్నా అతి మకరందం
చెలి లేత అధరామృత తియ్యదనం

మరుమల్లె పువ్వు కన్నా తెల్లదనం
చెలి మదిలో విరిసిన మా ప్రణయం

చేమంతుల కన్నా చక్కని చక్కదనం
చెలి మోమున పూసే నవ్వుల విరివనం

ముద్దబంతి కన్నా ముద్దైన మనోహరం
చెలి ముగ్ధ మోహన సుందర రూపం

లేతగులాబి కన్నా మరింత సున్నితం
చెలి హృదయాన వీచే ప్రేమ పవనం

సన్నజాజి తీగ కన్నా కడు వయ్యారం
చెలి నడకలలో వంపుల లయ సోయగం

ఎర్రగులాబి కన్నా చిక్కని ఎర్రదనం
చెలి బుగ్గన జారే సిగ్గుల సింధూరం

విరబూసిన పూదోటకన్నా ఆహ్లాదం
చెలితో గడచిన మరపురాని కాస్త కాలం

పువ్వుల గుసగుసల కన్నా నిశ్శబ్ధం
చెలి కళ్ళలో మాటాడే చూపుల మౌనం

పువ్వులపై వాలే తుమ్మెద కన్నా శబ్ధం
చెలి గుండెల్లో ఝుమ్మనే ఊసుల నాదం

చందమామ వెన్నలకన్నా చల్లదనం
చెలి కురిపించే ప్రేమ జల్లుల పరవశం

ప్రకృతి సోయగాల కన్నా స్వచ్చదనం
చెలి చూపించే అప్యాయత అపురూపం

కమ్మని కలకన్నా మధురాతి మధురం
చెలి మదిలో నాకిచ్చిన ఉన్నత స్థానం"

... ... ... ...♥
..♥♥..

-మీ చిట్టి, పండు

సుఖాల్లో లేకున్నా...కష్టాల్లో నేనున్నా

2011-09-30T17:30:00.007-04:00

"సుఖాల్లో ఎవరూ గుర్తుకి రారు
అయినా అందరూ దగ్గరకొస్తారు

కష్టాల్లో అందరూ గుర్తుకి వస్తారు
అయినా ఎవరూ దరిదాపులకీ రారు

సుఖాల్లో లేకున్నా
కష్టాల్లో నేనున్నా
అనగలిగేదే ప్రేమ ............"

..♥♥..

-మీ చిట్టి, పండు

కుశలమా ప్రియా...

2011-09-18T17:30:00.003-04:00

♥............

"నా తొలి ఉత్తరంలోని అక్షరాలు నిను

చేరి తరించి తాకిన నీ మది కుశలమా

పరిచయం స్నేహంగా మార్చిన తెల్లని

కాగితాలపై నల్లని సిరా చుక్కలు కుశలమా

స్నేహాన్ని పదిలమైన ప్రేమగా మలచిన మన

మొదటి కలయిక నిశ్శబ్ధ భావాలు కుశలమా

నను చూడకనే నాతో మాటలాడకనే మనసుని

నచ్చి వరించి మెచ్చిన నీ హృదయం కుశలమా

నా రాకకోసం నిలువెల్ల కనులై ఎదురుచూసిన

ఆ మధుమాస కాలపు జ్ఞాపకాలు కుశలమా

వస్తానేమోనని వేచి చూస్తూ కనబడగనే దూకి

నవ్వుతు దరిచేరిన ఆ ఎదురుచూపులు కుశలమా

నడుస్తున్నపుడు నా చేయిని ఒడిసి పట్టి

వడి వడిగా పరిగెత్తిన లేత పాదాలు కుశలమా

మనం ఎప్పటికీ ఇలానే హాయిగ ఉండగలమా

అంటూ బరువెక్కి అడిగిన గుండె కుశలమా

నీకు నేనున్నా ఎప్పటికైనా అంటూ ఒడి చేర్చి

ఓదార్చిన ఆ చల్లని మృదు చరణాలు కుశలమా

నీతోనే ఉంటా కడదాకా దూరమైనా దగ్గరైనా

అని కన్నీరు చిందిన కనుపాపలు కుశలమా

కరగిపోయిన కాలగమనంలో కలసినా చెరగక

మది వీడని తీపి అనుభవాల గురుతులు కుశలమా

బ్రతుకున వీడినా మనసున క్షణమైనా మరువలేక

మరణానైనా కలవాలని తపించే మనసు కుశలమా"

............♥

..♥♥..

-మీ చిట్టి, పండు

అరుదైన ఆ వరం

2011-09-10T17:30:00.000-04:00

♥............

"నీతో దూరంగా వెళ్ళి ఉండిపోనా
ఎవరూ దరిచేరని ప్రేమ తీరాల దాకా

చుట్టూ పచ్చని గడ్డీ, పంట పొలాలు
అందమైన రంగు రంగుల పువ్వులు

నీలాకాశం లో విరిసే ఇంద్ర ధనస్సు
నా కళ్ళలో మెరిసే నీ రూప తేజస్సూ

ఎదురుగ అందమైన సుందర సరస్సూ
చిన్ని చిన్ని నెమళ్ళు ఎన్నెన్నో నర్తిస్తూ

ఆకాశలోంచి వెండి చినుకులు రాల్తూ
నా ప్రేమలో నిండిన నిను నే ముంచేస్తూ

నా సమక్షంలో నువు సేద తీరుతూ
ఇద్దరం ప్రకృతిలో లీనమైపోతూ

ఘడియ అయినా చాలదా ఆ జీవితం
మదిచేరని వారితో జీవితమంతా ఏం లాభం

ప్రేమించటం గొప్ప అనుభూతే అవచ్చు
ప్రేమని పొందటమూ అదృష్టమె కావచ్చు

కానీ ఏ క్షణానైనా కళ్ళు మూసుకొని
మనకోసమె బ్రతికే మనసొకటుందని

తృప్తిని పొందగలగటం ఎందరికి సాధ్యం
ప్రేమను అనుభవించి పొందే అరుదైన ఆ వరం"

............♥
..♥♥..

-మీ చిట్టి, పండు

దూరాన ఉన్నా...

2011-09-05T17:30:00.006-04:00

♥.................

"ముందుంటే నీ రూపం చూడగలనేమో
నీ హృదయ కౌశలం చూడగలనా

దగ్గరుంటే నీ మాటలు వినగలనేమో
నీ మనసున ఆరాటం వినగలనా

నీ పక్కనుంటే కాస్త తోడవగలనేమో
నిను వీడని నీడని నేనవగలనా

వెన్నెలలో నీ చెంత చేరగలనేమో
నిద్దురలో కమ్మని కలనవగలనా

సున్నితమైన నీ చేయి తాకగలనేమో
కొనగోరు చూసి పులకించగలనా

నీతో జీవితం పంచుకోగలనేమో
నా జీవితమే నువ్వని అనగలనా..."

.................♥
..♥♥..

-మీ చిట్టి, పండు

మన ప్రేమ

2011-09-04T17:38:00.001-04:00

♥.................

నీ ప్రేమ కలయికలో ఈ జీవితం సాగాలని
ఎన్నో తీపి గురుతులు మొక్కలుగా నాటి
మురిపెంగా వాటి చుట్టూ ఆశల గిరి గీసి
ఎన్నెన్నో మధుర తలపులు మల్లెలుగా పూసి
మది నిండా పొందికగా అందమైన మాల చేసి
కలలు కంటూ ఆదమరచిన వేళ విధి రాతకి
బంధం కాకనే చెదిరిపోయిన స్వప్నానికి
తరగని కన్నీటి ధారలు అనుబంధంగా పోసి
నీ కోసం విలపించి బ్రతుకు భారమై పోయి
ఎడారిలో వసంతం కోసం ఎదురు చూసి
నిరాశల నడుమ ఎవరికొసమో తెలియని
ఈ బ్రతుకున కోల్పోయిన ప్రేమని తలచి
ఇక జన్మలో నిను చూడగలనా అని
ఆశలు అడియాశలయి ఇక కనబడవని
నిస్తేజమై ఉన్న ఓ ఉదయం మళ్ళీ నా జీవితంలోకి
లేత కిరణంలా వచ్చి నేను ఉన్నానని చెప్పి
నా మది చీకటి పొరలను కన్నీటితో తట్టి
నాలోని ప్రేమని మృదు మధురంగా నిద్దుర లేపి
కొత్తగ చిగురించిన ఆశలే బ్రతుకున ఊపిరి చేసి
జ్ఞాపకాల ఆనందంతో ముచ్చటైన పొదరిల్లు అల్లి
మనం మనకోసం చిన్ని గుండెల్లో కట్టుకుని
పదిలంగా చూసుకుంటున్న "చిన్ని ఆశ" ల
రూపం లేని అపురూపమైన కలయికే
............"మన ప్రేమ"

.................♥
..♥♥..

-మీ చిట్టి, పండు

నా నువ్వుంటే చాలు

2011-09-03T17:30:00.003-04:00

♥.................

"ఆ పిలుపు వింటే చాలు
నన్ను నేనే మరువనా
చుట్టూ ఎందరున్నా

ఆ చూపుంటే చాలు
చూపులో కరిగి పోనా
ఎన్ని యుగాలైనా

ఆ ప్రేముంటే చాలు
తరిస్తూ ఉండిపోనా
ఎన్ని వసంతాలైనా

ఆ కౌగిలి ఉంటే చాలు
కరిగిపొతూ వాలిపోనా
ఎన్ని జన్మలనైనా

నా నువ్వుంటే చాలు
నిన్నటి నీ నేనవనా
నువ్వూ నేనూ వేరైనా

ఇంకా నువ్వూ నేనేంటి
నేనూ నువ్వూ ఒకటే కదా
మనం మన మనమే కాదా !"

.................♥
..♥♥..

-మీ చిట్టి, పండు

నువు లేవని...

2011-09-02T17:30:00.000-04:00

"నీ రాక కనబడలేదని వసంతమే ఆగిపోయెనా
నీ మాటలు వినబడని కాలమే మూగబోయెనా
నిను చూడని కళ్ళకి కాంతి చిమ్మచీకటాయెనా
నీ నవ్వులు లేవని పువ్వులు విరబూయమనెనా

నీ సొగసులు చూడని నా మది చిన్నబోయెనా
నీ కుశలం తెలియని నా గుండె తల్లడిల్లెనా
నీ కోసం చూసి హృదయం అలసిపోయెనా
నీ తలపుల్లో మనసు దిగులుగా నిదురవోయెనా..."

-మీ చిట్టి, పండు

..♥♥..

ఆశల సౌధం

2011-08-30T17:30:00.008-04:00

♥.. .. .. .. .. ..

నీతో కలసి అందంగా కట్టుకుంటున్నా ఓ ఆశల సౌధం
మన ప్రేమకి గుర్తుగా నా గుండెల్లో ఓ అందమైన లోకం
నాతో కలసి ఉంటావా అక్కడ ఆనందంగా కలకాలం
అక్కడ మనలని విడదీసిన ఆ విధికి సైతం లేదు ప్రవేశం

మనకి మనమే ఆ లోకంలో మహరాజూ మహారాణిలం
ఆకాశం, ప్రకృతి, పక్షులు, జలాశయాలే మన నేస్తం
పులకింతలు రేపే ఆ సుందర రమణీ గిరి వనాల్లో మనం
హాయిగ తిరుగుతు కలసి ఆస్వాదించే అంతటి అందం

కళ్ళూ కళ్ళూ కలిసి మైమరచి పోయే తరగని సమయం
చెయ్యీ చెయ్యీ పట్టి నడకల్లో తెలియని సుదూరం
గుండె గుండె కలసి ముచ్చటగా కబుర్లు చెప్పుకోవటం
మన మనసులు కలసి మురిసి మెరిసే మన స్వప్నలోకం

ఉంటావా నేస్తం అక్కడ నాతో ఆనందంగా చిరకాలం

.. .. .. .. .. ..♥
..♥♥..

-మీ చిట్టి, పండు

అర్పితం నీకే ఈ జీవితం...

2011-08-28T17:30:00.004-04:00

♥.................

నిను దరిచేరేందుకు లేనే లేదు నాలో సంకోచం
నీ కౌగిలిలో ఒదిగాక నీ గుండెనె నా ప్రపంచం
కలగంటున్నా నీ ఎదపై ఉండాలని కలకాలం
అర్పించాలని ఉంది నీకే నా జీవిత సర్వస్వం

నీ సాన్నిధ్యాన్ని ఆనందిస్తూ చేరా నీ దరికై
నీ ప్రేమంతా నాదేనా అన్న సమాధానంకై
నీ కన్నుల్లో వెతికా ఆర్తిగా నా రూపుకై
నీ గుండె చప్పుడులో వెతికా నా పేరుకై

కానీ ఎందుకు నాలో ఏదో తీరని ఈ ఆరాటం
నా నువ్వు నువ్వేనా అని ఎక్కడో పోరాటం
ఆగెనా ఎన్నటికైనా మనసుతో నా చెలగాటం
తీరునా ఎప్పటికైనా కానరాని ఆ సంకటం

.................♥
..♥♥..

-మీ చిట్టి, పండు

నాకన్నీ స్వచ్ఛమే

2011-08-27T17:30:00.002-04:00

♥.................

నీ మోమున విరిసే ఆ నవ్వు స్వచ్ఛమే
తామరాకుపైన మెరిసే నీటిబిందువులా

నా తలపు వెనక నీ రూపు స్వచ్ఛమే
మబ్బుల వెనక దాగిన చందమామలా

నాపై కురిపించే నీ ప్రేమ స్వచ్ఛమే
పచ్చని ఆకులపై లేత సూర్యకిరణంలా

మన మనసుల్లోని మన గతం స్వచ్ఛమే
పువ్వుల్లోని తియ్యని మకరందంలా

నిత్యం మదిలో మెదిలే నీ మాట స్వచ్ఛమే
వెన్నెల నదిలో కదలాడే మమతల నావలా

అనునిత్యం కదిలించే మన కన్నీరు స్వచ్ఛమే
చూడకనే ఆగేనా అని విలపించే చిన్ని గుండెలా
.................♥
.♥♥.

-మీ చిట్టి, పండు

ప్రేమ గురుతులు

2011-08-26T17:30:00.001-04:00

♥.................

మొన్నటి
నా ఊహలన్నీ నీ చుట్టూనే
ఆ ఊహల్లో తరలివచ్చింది నీరూపమే
ఆ రూపంతో కదలి వచ్చింది నీ నవ్వులే
ఆ నవ్వుల్లో విన్నా పక్షుల కిలకిల రావాలే

నిన్నటి
కమ్మని కల మొన్నటి ఊహలదే
ఆ కలలో కనిపించిన దివ్య రమణి నువ్వే
రమణి కాంతులకి చిన్నబోయింది ఆమనే
ఆ కల కాంతులలో విహరించా నీ చెంతనే

నేటి
తియ్యని అనుభూతి నిన్నటి ఆ కలదే
కల నిజమై నా ఎదురుగ ఉన్నది నా నువ్వే
చిరునవ్వుల పెదవులు మధ్య పలికింది నా పేరే
ఊహా లేక కలయా అని మైమరచింది నేనే

రేపటి
మధురం నిన్నటి తియ్యని అనుభూతే
అందులోని మాధుర్యం చెరగని ఒక జ్ఞాపకమే
ఆ జ్ఞాపకం మాటున ఊహ, కల, అనుభూతే
మరెప్పటికీ తరగని మన ప్రేమ గురుతులే

.................♥
...

-మీ చిట్టి, పండు

మా "చిన్ని ఆశ" కు జన్మదిన శుభాకాంక్షలు...

2011-08-23T20:00:00.006-04:00

మా "చిన్ని ఆశ" కు నేడు నిండు వసంతం.

గత సంవత్సరం ఇదే రోజు మా మదిలో మెదలిన ఆలోచనల ప్రతి రూపంగా ♥...చిన్ని గుండెల్లో ఆ "చిన్ని ఆశ" ఫలించేనా?...♥ అంటూ పుట్టిందే మా ఈ "చిన్ని ఆశ".

"పుట్టిన ప్రతి మనిషికీ ప్రేమంచబడే, ప్రేమించే అర్హత ఉంది. ప్రతి హృదయానికీ తోడుగ ఆ దేవుడు ఇంకో హృదయాన్ని సృష్టించి ఎప్పుడో, ఎక్కడో అవి ఎదురయ్యేలా చేస్తాడు. అది గుర్తించి కలసి జీవితం పంచుకుని తరించగల హృదయాలు ఈ భూమిపై కొన్ని మాత్రమే. అది గుర్తించక జీవితం అనే పుస్తకంలో ఏదో ఒక అధ్యాయంలో దాని ఉనికినెరిగి, మరల దానికై తపించే హృదయాలే అనేకం ఉంటాయి, ఆ తపనల్లో ఎన్నెన్నో "చిన్ని ఆశ" లూ చిగురిస్తాయి. అవి కొన్నైనా నెరవేరితే అదృష్టం, లేదంటే దురదృష్టం...." అలా మా ఆలోచనల్లోంచి పుట్టి తెలుగు బ్లాగు లోకం లోకి చిన్ని పాపాయి గా అడుగిడిన మా "చిన్ని ఆశ" వేసిన తప్పటడుగులనూ, చిందించిన బోసి నవ్వులనూ ఆహ్వానించి, ఆదరించి, అభిమానించి, మెచ్చి, స్పందించి తమ అభిప్రాయాలను మాతో పంచుకున్న మా పాఠకులందరికీ పేరు పేరునా ధన్యవాదాలు.

ఇంటర్నెట్ లో బ్లాగు లోకం ఎందరో ప్రతిభ ఉన్న రచయితలకి తమ ఆలోచనలని ఇతరులతో పంచుకునేందుకు వెలసిన ఒక చక్కని వేదిక. ఎందరో పెద్ద పెద్ద రచయితలూ, రచయిత్రులూ, కవులూ, కవయిత్రులూ, ఆలోచనాపరులూ ఉన్న ఈ లోకంలో అడుగిడిన మా "చిన్ని ఆశ" కూ మొదట సహజంగానే మా ఆలోచనలూ, రచనలూ ఇతరులకు నచ్చుతాయో లేదో అన్న సంశయమూ లేక పోలేదు. కానీ మా ఆలోచనలకు చక్కని సహకారం, ప్రోత్సాహం అందిస్తూ ఎందరో తోటి బ్లాగర్లు, మరెందరో పాఠకులూ, చదివి స్పందించిన మనసులూ మమ్మల్ని ఈ బ్లాగు లోకంలో ముందుకి నడిపారు. మమ్మల్ని అభినందించిన ప్రతి ఒక్కరికీ మళ్ళీ ధన్యవాదాలు.

నిరాశల సముద్రం లాంటి జీవితంలో ఆశల తీరంకై వెతికే ఎన్నో మనసుల "చిన్ని ఆశ" లు ఫలించాలని ఆశిస్తూ.....

-మీ చిట్టి, పండు

జాడైనా కనీసం...

2011-08-20T17:30:00.007-04:00

♥.................

సన్నగ వీచే చిరుగాలీ చెప్పవే
నా వెచ్చని చెలికాడెప్పుడొచ్చేనో

పయనించే మబ్బూ మాటలాడవే
నను నా రాజెన్నడు కలిసేనో

ఎగిరే ఓ పావురమా తెచ్చావా
నా నేస్తం కమ్మని కబురేదైనా

వెన్నెల చందమామా చూశావా
నువ్వైనా వెన్నెలలో తన రూపాన్ని

మురిసే గువ్వల జంటా కన్నారా
మీరైనా నా ప్రాణ హృదయాన్ని

చేస్తారా మీలో ఎవరైనా నాకో సాయం
కనుగొనరా చెలికాడి జాడైనా కనీసం

.................♥
...

-మీ చిట్టి, పండు

సున్నితంకే భాష్యం చెప్పే...

2011-08-14T17:30:00.001-04:00

♥.................

నా చెలి అందం చూసిన ఈ కళ్ళకి
కోటి తారల మెరుపైనా చిమ్మ చీకటే

చెలి తో గడిపిన ఆ క్షణం ముందు
స్వర్గ లోక నివాసమైనా దిగదుడుపే

సున్నితంకే భాష్యం చెప్పిన ఆ స్పర్శ
మరవలేదు ఇక మిగిలిన ప్రతి శ్వాసా

వెచ్చని కౌగిలిలో కరిగిన నా ప్రాణం
పోటీ పడలేనంటూ ఆగిపోయెను కాలం

జన్మ జన్మలకీ మరువలేని ఆ కానుక
పొందిన నేనేగా మా ప్రేమకధిపతినిక

ధన్యమైతిని చేరువై చెలి పాదాల చెంత
వీడని నీడనై ఉండిపోనా ఈ జన్మంతా

.................♥
...

-మీ చిట్టి, పండు

అన్నీ నేనవ్వాలని...

2011-08-07T17:30:00.002-04:00

♥ నీ కురులను తాకే చిరు గాలినవ్వాలని
నీ కన్నులలో సన్నని కాంతి నవ్వాలని
నీ చెవిన గానమై నీలో రాగం పలకాలని
నీ లేత పెదవులపై ఆరని తడినవ్వాలని
నీ తీయని స్వరంలో మాటనవ్వాలని
నీ చిరుగుండెలో ఆగని చప్పుడునవ్వాలని
నీ హృదయంలో మధుర జ్ఞాపకమవ్వాలని
నీ కొనగోట మీటే సన్నని తీగనవ్వాలని
నీ పాదం తాకి తరించే పుడమినవ్వాలని
...

చీకటి వేళ చిరు దీపమై నీముందు వెలగాలని
వెలుగుల వేళ నీడనై నీ వెన్నంటే ఉండాలని
ఆకలిలో అమృతమై నీ కడుపున నిండాలని
దాహంలో చల్లని జలమై నీ గొంతుని తడపాలని
నిద్దురలో జోల పాటనై నీ కన్నులలో దాగాలని
స్వప్నంలోనైనా కరగని మధుర జీవితమవ్వాలని... ♥
...

-మీ చిట్టి, పండు

ఆ చూపుల్లో 'నే' జీవిస్తున్నా...

2011-07-24T17:30:00.000-04:00

♥

చెప్పే వెళ్ళు అన్నా
వెళ్ళగలవా
నన్నొదలి ఎక్కడికైనా అని

చెప్పకనే వెళ్ళినా
చేరుకోలేవా
నను ఆఖరిక్షణమైనా అని
..

చూస్తూనే ఉన్నా
దూరంగానైనా
నువ్వేసే ప్రతి అడుగునీ

నావైపు ఎప్పటికన్నా
రాక పోవునా
పూల గంధాలతోనని
..

నువు లెక్కలు పెట్టే
ఎన్నో చుక్కల్లో
మిణుకుమని మెరుస్తూనే ఉన్నా

నీకోసం పరుగులుపెట్టి
ఆన్ని దిక్కుల్లో
తళుకుమని ఆగి చూస్తూనే ఉన్నా
..

వేచా జీవితమంతా
నువ్వు కావాలి
అంటావనే తెలియని ఆశగా

కాచా కళ్ళంతా
కన్నీటి జాబిలి
చీకటినే తెలిసిన నిరాశగా
..

కలపకపోదా ఋణానుబంధం
నిన్నూ నన్నూ వీడక
గుండెల్లో నీతో కడదాకా

నింపుకునే ఉన్నా నీరూపం
వస్తావా రావా అనక
కళ్ళల్లో నువ్వొచ్చేదాకా
..

ఎన్నైనా ఎదురుచూపులు
తరగవని
తెలిసినా బ్రతికే ఉన్నా

కొన్నైనా ఆ చూపులు
కరగవని
తపిస్తూ 'నే' జీవిస్తున్నా
..

♥

-మీ చిట్టి, పండు

ఎదురుచూపులే తియ్యనా...

2011-07-23T17:30:00.004-04:00

♥
చెప్పి వెళ్ళు అన్నావ్

అలాగే అన్నా

నువ్వెదురు చూస్తావని

చెప్పకనే వెళ్ళావ్

అలాగే ఉన్నా

నువ్వొచ్చి చూస్తావని
..

ఎదురు చూశా జీవిత కాలం

నువ్వొస్తావని

అయినా ఎందుకీ ఆరాటం

తెలిసినా ఈ క్షణం

నువ్వు రావని

ఒప్పుకోలేని హృదయం
..

నీకోసం వేచి చూస్తూ

లెక్కలు పెడితే

తరిగిపోదా చుక్కల సంఖ్య

నాకోసం నువు వస్తూ

ప్రేమలు తెస్తే

పెరిగిపోదా జీవన సాంఖ్య
..

ఈ జీవన మలుపుల్లో

మళ్ళీ నిన్ను

కలవకపోతానా అన్న ఆశ

కానీ గుండె ఆవేదనలో

వీడి నన్ను

వెళ్ళిపోయావా అన్న నిరాశ
..

♥

-మీ చిట్టి, పండు

మనకూ రెక్కలుంటే...

2011-07-22T17:30:00.003-04:00

♥

మనకూ పక్షుల్లా రెక్కలుంటే
నీతో కలసి ఈ లోకాన్నంతా
విహరిస్తూ గాలిలో చుట్టేస్తుంటే
మరచిపోమా బాధాప్రపంచమంతా

ఎప్పుడనుకుంటే అప్పుడు ఎగిరి
వచ్చి వాలనా నీ మది ముంగిట
ఎద చేసే భావ సరిగమల అల్లరి
పాడనా మన సరాగాల సందిట

నీ పక్కన ప్రకృతి విహారి నై
పరిమళించు నీ నవ్వులే బాటగా
ఎగిరి అలసి వాలిన పుడమిపై
సేదతీరనా నీ ఒడిలో ప్రాణంగా...

-మీ చిట్టి, పండు

నీ పరిచయం...

2011-07-21T17:30:00.022-04:00

♥

నువ్వయ్యాకే పరిచయం
తెలిసిందసలు ప్రేమకి అర్థం
చూశానందులో మాధుర్యం
మునుముందుకి నడిపే స్థైర్యం

నీ ఆలోచనలో ఏదో స్ఫూర్తీ
నీ తలపులో తెలియని శక్తీ
నీ పిలుపులో ఎంతో తృప్తి
నీ ఒడిలో వెచ్చని సంతృప్తి

భావించా నిను జీవితవరం గా
పూజించా గుండెలో పదిలం గా
మలిచా మదిలో మూర్తి గా
కొలిచా హృదయ దేవత గా...

-మీ చిట్టి, పండు

ఆ తొలి జ్ఞాపకం

2011-07-20T17:30:00.004-04:00

అప్పటి దాకా తెల్లని కాగితంపై వయ్యారంగా ఒదిగి పొదిగిన నీ చేతి అక్షర ముత్యాలు తప్ప నిను చూడని కనులు...నిన్ను ఎప్పటికైనా కలవగలనా అని సందేహపడుతూ నీ ధ్యాసలోనే గడిపిన నా హృదయం...ఆరోజు నిను చూడగలనని ముందు రోజు సైతం ఊహించలేని నా మనసు...తలచినదే తడవు గుండె తలుపులు తెరుచుకుని వచ్చి తన తలపులలో పలకరించే ప్రియ నేస్తాన్ని చూసుకుని పొంగిపోవాలని ఉరకల చప్పుడుతో ఉద్వేగం పరుగులు పెట్టిన గుండె...నీ వద్దకై బయలుదేరిన మరు క్షణం అప్పటికెన్నో భావాలకి అక్షర రూపం ఇచ్చినా మునుపెన్నడూ ఎరుగని చెమటలతో చల్లబడ్డ అరచేతులు...అన్నిటినీ నీ దరికి చేర్చాలని నడకలే పరుగులు గా వడి వడిగా నడచిన పాదాలూ...మనసెక్కడో...మనిషెక్కడో...అన్నట్టు చుట్టూ ప్రపంచం మరచి నిను చేరిన ఆ మధుర క్షణం...

కాస్త సిగ్గు, కాస్త బిడియం కలిపి స్వచ్చమైన తెల్లని చీరలో నను చూసి నవ్వే పలకరింపు గా నడచి వస్తున్న నిను చూసిన నా హృదయం లో నా కనులు చెక్కిన ఆ చక్కని పొందిక అయిన రూపం ఇప్పటికీ నా మదిలో చెక్కు చెదరని "ప్రేమ శిల్పం"...

ఇన్నాళ్ళూ నా కనులు చూడని, నా హృదయం చూసిన నా చిన్నారి స్నేహం, నా ప్రాణంగా అనిపించే నా ప్రియ నేస్తమేనా నా ముందు ఇలా బిడియంగా, సిగ్గు తో చిరునవ్వుల పలకరింపులతో ఉన్నది అని ఆనందంలో మాటలు రాక మూగబోయిన మనసు, తృప్తి గా చూసుకుని మాటలాడుకోవాలని ఆరాటపడి మౌనమే మాటలు అయిన హృదయం...

నీ ఎదురుగ కూర్చుని లోకం మరచిన ఆ కొద్ది క్షణాలు అలాగే నిలబడిపోతే ఎంత బాగుండేదో...

గుండెలో మధురంగా నిలిచిన అప్పటి "మన మొదటి కలయిక" ఇప్పుడు ఓ అందమైన జ్ఞాపకం అయినా, ఆ కొద్ది క్షణాలు అన్నీ మరచి మనసారా నీతో పంచుకున్న నా మనసు, హృదయం ఇప్పటికీ ఆ జ్ఞాపకాల తలపులనే తలుచుకుంటూ అప్పుడప్పుడూ ఇంకా ఈ లోకం వదలి అప్పటి మన లోకానికీ, మనదై పూర్తిగా మనిద్దరి సొంతమైన ఆ కొద్ది క్షణాలకీ వెళ్తూనే ఉన్నాయి. వెళ్ళి వచ్చి అప్పటి మధురమైన ఆ "మన మొదటి కలయిక" అనుభూతిని ఇప్పటికీ "ఓ అందమైన జ్ఞాపకంగా" నన్నీ లోకానికి దూరంగా నీతో తీసుకుని వెళ్తూనే ఉన్నాయి....

-మీ చిట్టి, పండు

మారని మమతే ప్రేమ...

2011-07-19T17:30:00.000-04:00

కాలంతో మార్పు సహజం. భూమీ, ఆకాశం, కొండలూ, కోనలూ, చెట్లూ, చేమలూ, వాగులూ, వంకలూ, మనుషులూ, మమతలూ...చివరికి రాళ్ళూ, రప్పలు సైతం కాలంతో ఎన్నో మార్పులకు లోనవుతాయి. కాలంతో మార్పులకు లోనుకాక, పరిస్థితుల ప్రభావాలకూ లోనుకాక, కాలంతో మారక మనసులో కలకాలం ఒక్కలానే నిలచి ఉండేదే "ప్రేమ".

ప్రేమించిన హృదయం దగ్గరగా ఉన్నా, దూరం అయినా ఎప్పటికీ ప్రేమిస్తూ ఉండటమే "నిజమైన ప్రేమ". తను ప్రేమించిన హృదయం దూరమైందనో, మరే ఇతర కారణంతోనో మదిలో పుట్టిన ప్రేమని చంపుకోవాలని ప్రయత్నం చేస్తే అది మరింతగా పెరుగుతుందే తప్ప హృదయం వీడి ఎప్పటికీ పోదు.

మానవ జీవితంపై ఎన్నో ప్రభావాలుంటాయి. నేడున్నట్టు జీవితం రేపుండదు. ఏ ఇద్దరు మనుషులూ, వారి ఆలోచనలూ ఒక్కలా ఉండవు. అంతెందుకు ఒక మనిషి ఆలోచనలే ఒక నిమిషం ఉన్నట్టు మరో నిమిషం ఉండవు. అంటే మనిషీ కాలంతో మారుతూ పోతుంటాడు. మన చుట్టూ ఉన్న పరిసరాలూ కాలంతో మారుతూ పోతుంటాయి. మన పరిసరాల ప్రభావం, చుట్టూ ఉన్న మనుషులూ, పరిస్థితుల ప్రభావం ఎల్లవేళలా మనపైన పని చేస్తూనే ఉంటుంది.

కానీ కాలంతోబాటుగా ఎలాంటి ప్రభావానికీ లోను కానిదే "ప్రేమ". కలసి బ్రతికే ప్రేమికులు ఖచ్చితంగా అదృష్టవంతులు. విడిపోయి బ్రతికే ప్రేమికులు దురదృష్టవంతులే. అయినా ఒక రకంగా ధన్యులే. తమ ప్రేమను గుండెల్లో దాచుకుని ప్రతి నిమిషమూ తలచుకుంటూ గడిపే ధన్యజీవులు. మన కోసం అన్నీ చేసిన రక్త సంబంధాన్నో, బంధుత్వాన్నో ప్రేమించటం పెద్ద విశేషమేమీ కాదు. కానీ ఏమీ చెయ్యకపోయినా తన హృదయం ఇచ్చి, ప్రాణం ఇవ్వాలని ఆరాటపడుతూ ప్రేమని పంచి ఇచ్చే ప్రియురాలో...ప్రేమికుడో ఉంటే?దూరమైనా తనెక్కడున్నా సుఖసంతోషాలతో జీవించాలని నిత్యం తలుచుకుంటూ ఆరాధించే హృదయం పొందిన మరో హృదయం ఉంటే? తనని ప్రాణంగా ప్రేమించిన హృదయాన్ని తలచుకుంటూ గడిపే ఆ జన్మ నిజంగానే తృప్తిగా అనిపించదూ! ఎన్నటికీ తీరని ఆ తృప్తి ఎప్పటికీ అలానే ఉండదూ! కాలంతో మాయని, మారని ఆ మమతే ప్రేమ.

"Love lasts longer than Life"

-మీ చిట్టి, పండు

నా ఆ"రాధ"న

2011-07-18T17:30:00.000-04:00

నిన్నింతగా ఆరాధించే నా
ఆ"రాధ"న ఈ నాటిది కాదు...

ఈ జన్మలో సగ కాలం ఇప్పటికే
హృదయం విరహజ్వాలల సెగలకే
నీ పక్కన గడచిన ఆ కొద్ది కాలమే
మిగిలిన ఈ జన్మంతా ఇక జ్ఞాపకమే

గత జన్మ రహస్యం తెలియకనే
నీ రూపం ఎన్నో జన్మల పరిచయమే
అనిపించెను మన మొదటి కలయికే
తలపించెను ఏవేవో మధురిమలనే

మరు జన్మలో పూర్తిగ నీ చెంతనే
నీ చేరువలో నా మది ఆనందమయమే
ఆ రూపం ఆ మనసూ నా సొంతమే
ఆ పై జన్మలన్నీ నీకిక అంకితమే

-మీ చిట్టి, పండు

అలక పోవాలంటే?

2011-07-17T18:21:00.000-04:00

ఏ కల్మషం లేనిదే ప్రేమ...ఎంత బాగుంది కదూ! అవును, కల్మషాలుంటే అది ప్రేమ కాదు.

అంతా బానే ఉంది కానీ పండు మీద చిట్టికి నిన్న బోల్డ్ ...నిజంగానే బొల్డంటే బొల్డంత కోపమొచ్చింది. సరే మరి కోపమొస్తే ఎవరన్నా ఎమంటారూ? మీరు చెప్పండి? హ్ మ్ మ్... పాపం చిట్టి కూడా కోపంలో "నాతో మాట్లాడొద్దు పో" అందంట. అది తప్పా? అహ...కోపమొస్తే మాట్లాడొద్దు పో అంటం తప్పెలా అవుతుందండీ? అప్పుడు పండేం చెయ్యాలీ? "చిట్టీ! తప్పయ్యిందమ్మా, నా బంగారు తల్లి కదూ ప్లీజ్ నాతో మాట్లాడవూ!" అని బ్రతిమాలు కోవద్దూ! కోవాలా వద్దా మీరే చెప్పండి. కానీ పండు ఒక్క మాటన్నా మాట్లాడకుండా ఊరుకున్నాడు. మరి, పాపం...చిట్టి కదూ! ఎప్పుడు "చిట్టీ" అని దగ్గరకొస్తాడా అని ఎదురు చూస్తూనే ఉంది. హహ్...ఎన్నాల్టికి అర్ధం చేసుకుంటాడో! అసలు పండుకి తెలియక్కర్లేదూ! కోపమొస్తే మాత్రం ప్రే మెక్కడికి పోతుందీ? అన్నీ తొందరే! పెద్ద టఫ్ కుకీ అంకుంటాడు పండు.

చూద్దాం కయ్యానికి కాలు దువ్వాక వెనక్కు తగ్గేదే లేదు....
పండు మీదిప్పుడు చిట్టి నిజంగానే అలిగింది...అలక పోవాలంటే ఏంచెయ్యాలో పండుకి కాస్త మీరైనా చెప్పరూ, ప్లీజ్!

-మీ చిట్టి, పండు

...ఇవేవీ ఉండనిదే "ప్రేమ"

2011-07-17T05:13:00.000-04:00

చూపులో తడబాటుండొచ్చు
ఎదురుచూపులో ఉండదు

గొంతులో మార్పుండొచ్చు
గుండెలో ఉండదు

అలకలో కోపం ఉండొచ్చు
ఆరాధనలో ఉండదు

కోపంలో పొరబాటుండొచ్చు
శాంతంలో ఉండదు

మాటలో సందేహం ఉండొచ్చు
మనసులో ఉండదు

నవ్వులో కృత్రిమం ఉండొచ్చు
వేదనలో ఉండదు

ఆలోచనలో కల్మషం ఉండొచ్చు
కన్నీళ్ళలో ఉండదు

కలయికలో స్వార్ధం ఉండొచ్చు
విరహంలో ఉండదు

మనిషిలో ద్వేషం ఉండొచ్చు
మమతలో ఉండదు

బంధంలో అధికారం ఉండొచ్చు
అనుబంధంలో ఉండదు

కాపురంలో కలతలు ఉండొచ్చు
ప్రేమలో ఉండవు

తడబాటు పొరబాటు
మార్పు కోపం
సందేహం కృత్రిమం
కల్మషం ద్వేషం
కలతలు స్వార్ధం
అధికారం ...

...ఇవేవీ ఉండనిదే "ప్రేమ"

-మీ చిట్టి, పండు

నీలోనే కలిసి పోవాలని...

2011-07-09T18:00:00.002-04:00

నువు నడచిన చోటనే నడవాలని
నీ అడుగులో అడుగుల వేయాలని

నీ ఆలోచనలో మెరుపై మెదలాలని
నీ కన్నుల్లో కాంతినై కదలాడాలని

నీ చూపు సోకినవన్నీ తిలకించాలని
నిను తాకిన గాలి సోకి పులకించాలని

నువు తాకిన పువ్వుని నేనవ్వాలని
నీ నీడలొ తోడుగ కదలాడాలని

నీ ఒడిలో చల్లని స్పర్శనవ్వాలని
నీకు చలిలో వెచ్చని సెగనవ్వాలని

నీ పెదవిపై ఆరని తడినవ్వాలని
నీ బిగి కౌగిలిలో బంధీనవ్వాలని

నిను చూస్తూనే కను మూయాలని
నీలోనే శాశ్వతంగా కలిసి పోవాలని

-మీ చిట్టి, పండు

ప్రేమ

2011-07-02T20:00:00.002-04:00

కనులారా చూసుకోవాలి అనుకోటం ప్రేమ
మనసారా ముద్దాడాలనుకోవటం ప్రేమ
మదిలో ఒద్దిగ్గా ఒదిగిపోవాలనుకోటం ప్రేమ
ప్రేమగా గోరుముద్దలు పెట్టాలనుకోటం ప్రేమ
ఇష్టంగా ముద్దు ఇవ్వాలనిపించటం ప్రేమ
కష్టంలో కలసి ఉంటాననగలిగేది ప్రేమ
చీకటిలో వెలుగై తోడుగా ఉంటాననేది ప్రేమ
తుది శ్వాస లోనూ ఒడిలోనే ఉండాలనేది ప్రేమ
ఈ జన్మకి చాలు అని తృప్తినిచ్చేది ప్రేమ
జన్మ జన్మలకీ కావాలనిపించేది ప్రేమ
మళ్ళీ మళ్ళీ పుట్టాలని తపించేది ప్రేమ
అణువణువూ కావాలనిపించేది ప్రేమ
నీతోనే ఎప్పటికీ ఉండాలనిపించేది ప్రేమ
నాకు నువు కావాలనిపించేది ప్రేమ
నాకింకెవ్వరూ వద్దనిపించేది ప్రేమ
ప్రపంచం ఏమైనా కానీ అనిపించేది ప్రేమ
లోకంలో మనిద్దరమే ఉండాలనిపించేది ప్రేమ
దగ్గర లేకున్నా ఉన్నట్టే ఫీల్ అయ్యేది ప్రేమ
మనసారా అన్నీ అర్పించాలనుకునేది ప్రేమ
దగ్గరై జన్మ సార్ధకం చేసుకోవాలనేది ప్రేమ....

-మీ చిట్టి, పండు

నీ ప్రేమలొ జీవిస్తున్నా...

2011-06-21T18:30:00.006-04:00

ఆ


   మెరిసే మేఘం
   కదిలే కాలం
   ఎగిరే పక్షి
   పూచే పుష్పం
   సాగే సెలయేరు
   కూసే కోయిల

లోనూ...

నీ

   నల్లని నయనం

విరిసే వదనం

మురిసే మనసు

తీసే శ్వాస

వేసే పాదం

తీయని తలపు

తీరని వలపు

లనే కంటున్నా

నీ ప్రేమలొ జీవిస్తున్నా...

-మీ చిట్టి, పండు

మానవ 'స్వ'భావాలు

2011-06-14T19:00:00.001-04:00

మనకి రోజూ మన చుట్టూ రక రకాల స్వభావం గల మనుషులు కలుస్తూ ఉంటారు. కొందరు గల గలా పైకి మాట్లాడేస్తూ ఉంటారు. అయినా వారి మటల్లో ఎవ్వరినీ నొప్పించని సరళ స్వభావం కనిపిస్తుంది. వీళ్ళుంటే చుట్టూ అందరినీ పలకరిస్తూ ఆహ్లాదకరమైన వాతావరణం కనిపిస్తుంది. వీరు బోళా స్వభావం కల వారై ఉంటారు.

కొందరు తక్కువగా మాట్లాడుతూ ఎక్కువగా వింటూ ఉంటారు. వీరి ఆలోచనలూ, మాటలూ "నొప్పించక, తానొవ్వక" అన్నట్టుగా ఉంటాయి. వీరు మృదు స్వభావం కలిగిన వారై ఉంటారు.

కొందరు అందరినీ, అన్నిటినీ విమర్శిస్తూ ఉంటారు. విమర్శించటమే వీరి పనిగా అనిపిస్తారు. వీళ్ళు కనబడే రాయీ, రప్ప దగ్గరనుంచీ కనబడని దేవుడూ, దయ్యం వరకు దేన్నయినా విమర్శించి పారేయగలరు. వీళ్ళతో మాటల్లో నెగ్గటం ఎవరితరమూ కాదు.

కొందరు ఏదయినా తమకే అన్నీ తెలిసినట్టుగా చెప్పుకుంటూ పోతారు, ఇతరుల మాటలు వీరి చెవిన పడవు, వాస్తవాలు అసలే తెలియవు.

కొందరు గుచ్చి గుచ్చి మాటల ప్రశ్నలు సంధిస్తూ ఉంటారు. వీళ్ళు ప్రశ్నలతోనే మాట్లాడుతారు. అందరి దగ్గరా అన్ని విషయాలూ రాబట్టాలనే తపనతో ఉంటారు. చూసీ చూదక మునుపే వీళ్ళకి మదిలో అనేక సందేహాలు పుట్టుకొచ్చేస్తాయి.

కొందరికి తమ దగ్గర ఉన్నదానికన్నా పక్కన వాళ్ళకేమున్నదన్న ఆసక్తి అమితంగా ఉంటుంది. వీళ్ళకి జీవితంలో దేనికీ సంతృప్తి అన్నదే కలగదు.

కొందరు సరదాగా కనిపిస్తూ నొప్పిస్తూ మాట్లాడుతారు, అవతలి వాళ్ళు ఇలా అంటే బాధపడతారేమో అన్న సంకోచం ఏ మాత్రానా ఉండదు. ఎందరిలో అయినా, ఎవ్వరినైనా, ఎంత మాట అయినా అనేసి చక్కా వెళ్ళిపోతారు. వీళ్ళ బారిన పడ్డ వాళ్ళు వీళ్ళు కనిపిస్తే పలకరించాలంటేనే జంకుతారు.

ఇంకా ఇంకా ఎన్నెన్నో స్వభావాలు మనకి రోజూ మన చుట్టూ దర్శనమిస్తాయి. ఇన్ని రక రకాల స్వభావాలతో వేగటమే జీవితం.
అన్నిటికీ చిరునవ్వే సమాధానంగా తీసుకుని ముందుకెళ్తే ఎవరి స్వభావ ప్రభావం మనపై పడదు. లేదంటే మనుషుల స్వభావం, వారి మాటల ప్రభావం రోజూ కలతపెట్టక పోదు.

-మీ చిట్టి, పండు

గోరుంక గూటికే చేరావు చిలకా...

2011-06-05T17:30:00.002-04:00

ఓ అందమైన వనంలో ఒక చిలక గోరింకా ఉండేవి. ఆడుతూ పాడుతూ ఒకరంటే ఒకరికి తెలియకనే పెరిగాయి. ఒకరోజు ఎగురుతూ వెళుతున్న చిలుకకి ఓ గోరింక ఎదురయ్యింది. చూడగనే ఏదో తెలియని ఆప్యాయత రెండిటి మనసులలోనూ వెల్లువలా పొంగింది. కళ్ళూ కళ్ళూ కలిశాయి. మరుసటి రోజూ ఒకరినొకరు చూసుకోవాలనిపించింది. మళ్ళీ క్రితం రోజు ఎదురైన ప్రదేశంలోనే తారసపడ్డాయి. ఈ సారి మనసులు ఎన్నో తెలియని భావాలకి లోనయ్యాయి. అలా ఇక రోజూ అక్కడే ఎదురుపడుతూ చూసుకోసాగాయి. ఏరోజైనా ఒకరికొకరు ఎదురుపడకపోతే ఆ రోజంతా ఎంతో నిరాశగా గడిపేవి. రేపెప్పుడొస్తుందా అని ఎదురు చూసేవి. మరుసటి రోజు మళ్ళీ ఎదురుపడితే మురిసిపోయేవి. మాటలాడుకోకనే వాటి మనసుల్లో ఇష్టం ఏర్పడింది.

చాలా రోజులకి ఒకరోజు పలకరించుకునే ప్రయత్నం చేశాయి. ఆ ప్రయత్నంలో మాటలు మూగబోయాయి. ఏదో తెలియని ఇష్టంతో నవ్వులూ, నిశ్శబ్ధాలే మాటలయ్యాయి. అప్పటినుంచీ రోజూ కలుసుకుని కొంచెం కొంచెం ఊసులాడుకోసాగాయి. మనసులోని ఇష్టాన్ని మెల్లిగా బయటికి చెప్పుకున్నాయి. కలసి బ్రతకాలని ఆశపడి కొద్దిరోజులలా కలలు కనసాగాయి. రోజూ కలసి కబ్ర్లు చెప్పుకుంటూ భవిష్యత్తు కోసం అందమైన ఊహల బాటలు వేసుకోసాగాయి. ఇంతలో ఒకరోజు ఓ పెను తుఫాను అమాంతం వచ్చి చిలుకని ఎక్కడికో తీసుకెళ్ళిపోయింది.

మనసైన నేస్తం, కలలుగన్న హృదయం కనపడలేదని కొద్దిరోజులు ఆ గోరుంక దిక్కుతెలియక తిరగసాగింది. కాలంతో ఇక తన చిలుక తిరిగిరాదని గ్రహించింది. అలా చాలా కాలం వేదనగా, అసంతృప్తిగా గడిచిపోయింది. అవాంతరంగా తుఫానులో చిక్కుకుని అందని దూర తీరాలకు వెళ్ళిపోయిన ఆ చిలుకా వేదనపడుతూనే జీవించసాగింది. తన ప్రియనేస్తం కోసం తపించసాగింది. అందంగా అల్లుకున్న ఊహలు చెదిరిపోయి ఎందుకు బ్రతుకుతున్నామో తెలియక భారంగా బ్రతకసాగాయి. ఇలా చాలా జీవితం కన్నీళ్ళ కాల గమనంలో కొట్టుకు పోయింది.

కానీ ఒకరోజు ఊహించని విధంగా మళ్ళీ ఎదురయ్యాయి. జీవితంలో దారి తప్పి "ప్రేమ" కోసం వెతుక్కుంటున్న ఆ పక్షులు ఒక్కసారిగా ఎదురయ్యేసరికి ఆనందంలో పరిసరాలు మరిచి మైమరిచాయి. తన ప్రియనేస్తం కనిపించిందని, చుట్టూ ఉన్న లోకాన్నే మరచిపోయాయి. అంతే, ఆ మైమరుపులో కొందరు అదను చూసి బాణం వేశారు. కొంచెం గట్టి గానే తాకి పాపం విలవిలలాడాయి. కానీ అది వాటిని ఎగరకుండా ఆపలేదు. మళ్ళీ అవి రెక్కలు కూర్చుకుని ఈసారి తోడుగా కలిసి ఎగరాలి అని చాలా బలంగా అనుకున్నాయి. కన్నీళ్ళ పాలైన జీవితం తిరిగిరాదని గ్రహించి, మిగిలిన కొద్దిపాటి జీవితమే అందమైన భవిష్యత్తుగా అనుకున్నాయి. కనపడని ఆ భవిష్యత్తు కోసం ఆశగా ఎదురు చూడసాగాయి.

ఒకప్పుడు కలలు కన్న బంగారు భవిష్యత్తు కళ్ళముందే చెదిరిపోయినా, ఇప్పుడు కనపడని ఆ భవిష్యత్తుకోసం ఎదురు చూడసాగాయి. ఈసారైనా కలసి ఉంటూ అందులో కొద్దికాలమైనా ఆశగా జీవించాలనే ఆశతో...

తప్పక మంచి లోకం ఎక్కడో వాటి కోసం వుండే వుంటుంది, ఇక్కడ కాకపొతే పైనన్నా...

అలాంటి నిరాశాజీవుల జీవితం ఆశజనకం కావాలని మా "చిన్ని ఆశ".

-మీ చిట్టి, పండు

తొలి "చెలి" జ్ఞాపకాలు

2011-05-21T09:56:00.001-04:00

అప్పుడు...

తొలి ఉత్తరంలో పొదిగిన నీ అక్షర ముత్యాలు
తొలి స్నేహం ప్రియంగా మారిన మన పరిచయం
తొలి పరిచయం ప్రేమగా నీతో పెరిగిన యవ్వనం
తొలి సారి నిను చూసిన మధురమైన ఆ రోజు
తొలి చూపులో నీ కళ్ళల్లో ని బంగారు కాంతులు
తొలి మాట వెంబడే వినబడని ఆ నిశ్శబ్ధం
తొలి ప్రయాణం కలిసి చేసిన ఆ మధ్యాహ్నం
తొలి తొలకరి జల్లులొ తడిసిన ఆ సాయంత్రం
తొలి సారి నీ చేయి పట్టుకుని నడచిన ఆ బాట
తొలి వెన్నెల ఒడిలో కాలం కరిగిన ఆ రేయి
తొలి ముద్దు కోసం చేసిన ఆ చిలిపి అల్లరి

ఇప్పుడు...

నీలి నీడల కలల మాటున కరిగిపోయిన జీవితం
కూలి పోయిన చెక్కుచెదరని స్వప్నసౌధ శిధిలం
వాలి పోయిన రెప్పల మాటున తడసిన నీ రూపం
రాలి పడిన బిందువుల అలజడి కన్నీటి సాగరం

సోలి పోయెను వేదనతో రోదించిన హృదయం
కాలి పోయెను గుండె మంటలో నువులేని కాలం
మలి వరకూ ఆ "తొలి చెలి జ్ఞాపకాలే" శ్వాసలుగా
జాలి పడి వరమిస్తే జన్మజన్మలకూ ఉంటా నీ నీడగా

-మీ చిట్టి, పండు

"ప్రేమానుబంధం"

2011-05-17T18:30:00.008-04:00

"నా" అనుకున్న ప్రతిదానిమీదా మమకారం కలగటం జీవితంలో సహజం. ఒక వస్తువైనా, ఒక మనిషైనా, ఒక ప్రదేశమైనా "నా" అనిపిస్తే ఎక్కడలేని మమకారం సహజసిద్ధంగా మదిలో చేరి ఎల్ల కాలమూ చోటుచేసుకునే ఉంటుంది. నా అమ్మ, నా నాన్న, నా ఊరు, నా వస్తువులు అని అనుకోబట్టే , అనుకునే స్వేచ్చ ఉండబట్టే స్వతహాగా మమకారం, ఇష్టం వాటంతట అవే పుట్టుకొస్తాయి. అలా "నా" అనుకునే అధికారం, హక్కులు ఇలా ఎన్నెన్నో ఆపాదించి పెడతాయి.

కానీ "నా" అన్న ఏ భావనకి పొంతన లేని ఓ ప్రత్యేకమైన భావనతో మదిలో మొదలయ్యేది "ప్రేమ". ఒకసారి ఒకరిపైన "ప్రేమ" భావం మదిలో పుడితే అది ఎన్నటికీ పోదు. రక్తసంబంధం లా "నా" అని స్వేచ్చగా బయటికి చెప్పుకునేందుకు వీలుకాకున్నా, మదిలో "నా" అనుకునే వాళ్ళకన్నా వాటికన్నా, మిన్నగా చేరువై ఎల్లకాలమూ చోటు చేసుకుని కొలువుండగలిగేది "ప్రేమ". కని, పెంచి, పెద్ద చేసిన రక్తసంబంధం కూడా వద్దు, ఆ "ప్రేమ సంబంధం" కావాలి అనిపించేంతగా మనసుని ఆక్రమించేసేది "ప్రేమ". కారణం- జీవితంలో మనిషికి మనిషి తోడెంత అవసరమో మనసుకీ ఓ మనసు తోడు అంతే అవసరం. ఆ తోడు కడదాకా స్వేచ్చ గా చెప్పుకోగలిగే ఏ రక్తసంబంధమూ ఇవ్వలేదు. కానీ స్వేచ్చగా చెప్పుకోలేని "ప్రేమ సంబంధం" ఇవ్వగలదు.

రక్త సంబంధం - వినటానికి బహు గొప్పదైన బంధం. కానీ ఇది స్వార్ధపూరితం అవగలదు. విషమయం అవగలదు. దగ్గరున్నా దూరం అవగలదు. అసూయా, ద్వేషం, కలహాలూ, కలతలూ, కల్మషమూ, బేధాభిప్రాయాలూ, పోట్లాటలూ ఇలా ఎన్నెన్నో చాలా సులభంగా తెచ్చిపెట్టగలదు. కష్టాలలో ఆదుకోదు. ఇష్టాలలో దరికి రాదు.

కానీ "ప్రేమ సంబంధం" వీటన్నిటికీ అతీతం. ఇది నిస్వార్థపూరితం. విషమయం అవటం అసాధ్యం. దూరానున్నా మదికి దగ్గరై చేరువ కాగలదు. అసూయ ఆమడ దూరం. ద్వేషం దరిదాపులకైనా రాలేదు. కలహాలు వచ్చినా అర్థం చేసుకుని మసలుకోగలదు. కలతలు పడ్డా ప్రేమగా ఒదార్చుకోగలదు. కల్మషం అసలే లేనిది, బేధాభిప్రాయాలు నీయనిది. పోట్లాటలు తెలియనిది "ప్రేమ". కానీ సుఖాలకన్నా కష్టాలను మాత్రం చాలా సులభంగా దరి చేర్చగలదు. అయినా ఆ కష్టాలలో ఇష్టాలని చూసుకోగలిగే గొప్ప అను బంధమే, 'అనుబంధమే' "ప్రేమ". అందుకే రక్తాన్ని బంధం తో ముడిపెట్టి "రక్తబంధం" అనగలమే తప్ప, "రక్తానుబంధం" అనలేం. కానీ ప్రేమని అనుబంధం తో ముచ్చటగా కలిపి "ప్రేమానుబంధం" అనగలం. సృష్టి లో ప్రతి బంధానికీ, సంబంధానికీ మదిలో ఒక విధమైన భావం ఉంటుంది. కానీ అన్ని భావాలకన్నా తియ్యనైన భావం "ప్రేమ".

అలాటి "ప్రేమ" అనే మధుర భావం జీవితంలో ఒక్కసారే, ఒక్కరిపైనే పుడుతుంది. పుట్టి అనుబంధంతో పెనవేసుకునే ఆ "ప్రేమానుబంధం" మది ఎన్నటికీ వీడి పోదు, పరిస్థితుల వల్ల కలిసి జీవించలేకపోయినా అనుక్షణం హృదయంలో చేరి "ప్రేమాలాపన" చేస్తూనే ఉంటుంది. దేనికోసమో దాన్ని చంపుకోవాలన్నా చావదు. ఒకవేళ చంపుకున్నాను అని ఎవరైనా అనుకున్నా అది కేవలం భ్రమ మాత్రమే. "ప్రేమించటం కన్నా ప్రేమించబడటం గొప్ప" అనేది అందరికీ తెలిసిన సత్యం. అంతటి గొప్ప వరం వరించి వచ్చిన జీవితాన్ని వదులుకున్నా ఏదో ఒకరోజు పోగొట్టుకున్న ప్రేమ కోసం పరితపించక తప్పదు. ఆ పరితాపంలో "కాలం ఒక్కసారి వెనక్కెళ్ళగలిగితే..." అనిపించకా పోదు. కానీ ఒకవేళ మరలా ఆ ప్రేమించే మనసు జీవితంలో ఎదురైతే? నా బ్రతుకింతే అని సరిపెట్టుకోవటమా? లేదు నా ప్రేమ ఇప్పటికీ పదిలమే అని గుర్తించటమా? ఈ సందిగ్ధం లో సతమతం అవుతూ బ్రతకటమా? ఈ సందిగ్ధం జీవితంలో ఎదురయ్యే "ప్రేమానుబంధాలు" ఈ ఇలలో ఎన్నో ఉంటాయి.

ఆ దుస్థితి ఏ ప్రేమ జంటకీ రాకూడదని, ప్రేమని గుర్తించి విడిపోక చేరువై జీవితాన్ని "ప్రేమానుబంధం" తో ప్రేమమయం చేసుకోవాలని మా "చిన్ని ఆశ".

"ప్రేమికులారా వర్ధిల్లండి!"

-మీ చిట్టి, పండు

ఎదమాటున...

2011-05-10T18:30:00.004-04:00

చుక్కల్లో చందమామ
గగనంలో వెలుగులు జల్లు
గుండెల్లో అందాలభామ
వదనంలో తలపులు విరజిల్లు

మబ్బుల మాటున రవి
ప్రకాశవంతమై ఉదయించు
ఎదమాటున ప్రియ బాంధవి
నిత్య తేజమై అలరించు

ఆకాశంలో స్వేచ్ఛగ
ఎగిరే గువ్వల జంట
హృదయంలో వెచ్చగ
విరిసే వలపుల పంట

తేలిపోయె నల్లని మేఘం
చల్లని చిరుగాలి సోకి
తీరిపోయె వెచ్చని తాపం
మధువొలికే అధరం తాకి

-మీ చిట్టి, పండు

అందానికె అందం నా చెలి రూపం

2011-05-03T18:30:00.002-04:00

సుకుమారి పాదం సుతి మెత్తగ తాకితె పులకించదా ధూళి సైతం
నడిచొచ్చే లేలేత అడుగుల తాకిడికి చేరదా నను ఆ ప్రకంపనం
కదిలే కురులను సవరించే కొనగోటి వేళ్ళకి ఎవరిచ్చెను ఆ వరం
సన్నగ వీచే చల్లని గాలి సైతం విస్తుపోయే సొగసైన ఆ సోయగం

చిత్రకారుడి కుంచెకందని కూర్చిన కనుబొమ్మల తీరైన ఆ క్రమం
కళ్ళల్లో విరజిమ్మే జీవనకాంతుల ప్రేమలో వెలిగి తరించదా నా జీవితం
నిండైన నా చెలి చిరునవ్వుల మాటలలో కరిగిపోదా కమ్మని కాలం
ఆ నగుమోము చూస్తూ ప్రపంచం మరచి ఉండిపోదునా కల కాలం

వెచ్చని సూర్యుడు చల్లని వెన్నెలతో దిద్దినదా నుదుటిన మందారం
కలువ కన్నుల కాంతుల మధ్య మరింత ఎరుపెక్కినదా సింధూరం
చీరకు ఎక్కడినుండి వచ్చి చేరెను అందని అంతటి నిండైన అందం
చెలిని తాకితినని ఆయెనా మురిసి మెరిసి రంగు హంగుల మయం

పచ్చని పసిడి మేని కాంతులతో కలిసినదా చందనపు పరిమళ గంధం
బంగరు కుందనపు బొమ్మలా ఒదిగి కూర్చుని ఉన్న అందని చందం
చెలి నవ్వుతొ అందానికే వన్నె చేరి వరించెనా నేడు మహరాణి వైభవం
కదలి వచ్చి దరిచేరిన చాలదా ఇక ఈ జన్మకి అంతటి అపురూపం

-మీ చిట్టి, పండు

నీ రాకతో...

2011-04-30T10:20:00.001-04:00

నీ రాకతో ప్రతి రోజూ
మధురమైన స్మృతి అయె

నీ పిలుపుతో ఈ రోజు
మది పులకరించి పోయె

నీ అనురాగం అనుదినం
నను లాలించి మైమరపించె

నీ తలపులు అనుక్షణం
నను వీడక మురిపించె

నీ మాటలు వింటూ గుండె
పరవశ ప్రేమగీతం పాడె

నీ నవ్వులు నా మదిలో
నిత్యం ఆనందాలు విరబూసె

నీ ప్రేమలో ఈ చిన్ని జీవితం
ధన్యోస్మి అంటూ తరించె

-మీ చిట్టి, పండు

జీవితం ఓ అందమైన ప్రయాణం

2011-04-22T06:02:00.001-04:00

ప్రయాణం - అనగానే అందరం ఎందుకో హడావిడి పడిపోతాం కదూ! ఫ్యామిలీని వదలి ఒక్కరమే ఎక్కడికైనా వెళ్తుంటే అంత హడావుడి పడమేమో కానీ నలుగురం కలిసి వెళ్తున్నపుడు మాత్రం చాలా హడావుడి పడతాం. సరిగ్గా టైం కి అన్ని పనులూ అయిపోతాయని తెలిసినా ఎందుకో ఆ హడవుడి, ఏదో తెలియని ఉరుకులు, పరుగులు...ఇది పెట్టుకున్నామా...అది సరిగా ఉందా...ఇలా పదే పదే చూసుకుని తీరా చివరికి అవసరం అయింది ఎదో ఒకటి మర్చిపోతుంటాం సహజంగా.

ప్రతి ప్రయాణం ఒక అందమైన అనుభూతే, దాన్ని సరిగా ఆస్వాదిస్తే. ప్రయాణం అనగానే అన్నీ సాఫీ గా జరిగిపోతే అందులో థ్రిల్ ఏముంటుంది చెప్పండీ? బయలుదేరినప్పుడు ఎంత ఉత్సాహంగా ఉంటామో, ఎప్పుడెప్పుడు గమ్యం చేరాలా అని ఆరాటంగా ఉంటామో కదూ! చిన్నప్పుడు అమ్మ నాన్నలతో కలసి బస్ లో వెళ్ళిన అమ్మమ్మ గారి ఊరికైనా, పెరిగి పెద్దయ్యాక ఫ్యామిలీతోనో, ఫ్రెండ్స్ తోనో కలసి విమానంలో వెళ్ళే సరదా ట్రిప్ అయినా అదే హడావుడి, అంతే ఆత్రుత.

కానీ ప్రయాణంలో కలీగే థ్రిల్స్ కొన్ని సరదాగా, కొన్ని చిరాగ్గా అనిపిస్తాయి కదూ! చుట్టూ రక రకాల మనుషులూ, రక రకాల వ్యక్తిత్వాలూ చూస్తాం. ఒక్కొకసారి వెయిట్ చెయ్యవలసి వస్తే అందరూ పడే చిరాకు అంతా ఇంతా కాదు, కొద్ది నిమిషాల్లోనే సహనం కోల్పోతుంటాం. గమ్యం చేరగానే హమ్మయ్య అనుకుంటాం. కానీ, గమ్యం ఎలా అయినా చేరుతాం అని తెలిసినప్పుడు, కొంచెం ఆ అసహనం, చిరాకులూ పక్కన పెట్టి ప్రతి క్షణాన్నీ ఆస్వాదిస్తూ ప్రయాణం చెయ్యగలిగితే దాన్ని నిజంగా ఎంజాయ్ చెయ్యగలం. కబుర్లు చెప్పుకుంటూ, ఏదైనా మ్యాగజైన్ కొనుక్కుని తిరగేస్తూ, పక్కన పిల్లలతో సరదాగా ఆడుకుంటూ, చుట్టూ కనబడే మనుషులనీ, ప్రదేశాలనీ చూస్తూ, సరదాగా సాగిపోయేదే ప్రయాణం, దాన్ని సరదాగా మార్చుకోవటం కేవలం మన చేతుల్లోనే ఉంది. అలా మార్చుకుని ప్రయాణిస్తే బడలిక అన్నదే లేకుండా హాయిగ ఎంజాయ్ చెయ్యగలం.

జీవితం ఓ సుదీర్ఘ పయనం, ఓ అందమైన అనుభవ ప్రయాణం. అందులో ప్రతి రోజూ ఓ ప్రయాణం వంటిదే. దాన్ని అందంగా, ఆనందంగా మలుచుకుని నిన్నని మరవలేనిది గా, నేటిని మరపురానిది గా చేసుకోగలిగితే, అసహనం చిరాకూ లేని అందమైన ప్రయాణం అవుతుంది. చివరికి గమ్యం చేరేనాటికి బడలికగా కాక తృప్తిగానూ అనిపిస్తుంది.

-మీ చిట్టి, పండు

నా తుదిశ్వాసలు

2011-04-19T18:30:00.010-04:00

స్వేచ్చగ విహరించేందుకే పక్షుల రెక్కలు
హాయిగ తిరిగేందుకే చేపల ఈదులాటలు
చెంగున దూకేందుకే లేగదూడల పరుగులు
కేరింతలకే చిన్ని పాపాయిల బోసి నవ్వులు

ఎదిగేందుకే మొక్కల పచ్చదనాలు
విరజిల్లేందుకే పువ్వుల పరిమళాలు
వీచేందుకే చల్లని ఋతు పవనాలు
నేలపై వర్షించేందుకే నల్లని మేఘాలు

దూకెందుకే ఎత్తయిన జలపాతాలు
పరవళ్ళు తొక్కేందుకే నదీ ప్రవాహాలు
పరిచేందుకే దట్టమైన విరి వనాలు
పరవశింపజేసేందుకే ప్రకృతి అందాలు

నిను తాకేందుకే ఈ మూగ భావాలు
నీ ఎద మీటేందుకే నా గుండె చప్పుడులు
నీ బిగి కౌగిట చేరేందుకే నా ఆరాటాలు
నీ పాదం తాకేందుకే కన్నీటి ప్రవాహాలు

నీ కదలికే మదిలో తియ్యని పులకింతలు
నీ జ్ఞాపకాలతో ఎన్నో మైమరపులు
నిను చేరేందుకే రోజూ ఎదురుచూపులు
నీలో కలిసిపోయేందుకే నా తుదిశ్వాసలు

-మీ చిట్టి, పండు

ప్రేమికుల మధ్య...

2011-04-12T21:26:00.004-04:00

కన్నీళ్ళకి తావుంది
కలతలకి అది లేదు

మృదు మాటకి చోటుంది
పరుష పదానికి లేదు

క్షమించే మనసుంది
ద్వేషించే మది లేదు

సున్నితమైన పిలుపులు
కఠినం కాని తగవులు

ఆశలమయమే జీవితం
నిరాశలే లేని స్వగతం

-మీ చిట్టి, పండు

ప్రేమానుబంధం మిన్న...

2011-04-05T09:36:00.002-04:00

అన్నీ ఆశించే దాంపత్య బంధంకన్నా
ఏమీ ఆశించని ప్రేమానుబంధం మిన్న

కలసి జీవం లేని నవ్వులకన్నా
విడివడిన గుండెలుపడే వేదన మిన్న

మనసురాక కలిసి బ్రతికే కలకాలంకన్నా
మనసున్న చోట నిలిచిన క్షణకాలం మిన్న

కలవక కలసిన మనుషుల రోదనలకన్నా
కలిసీ కలవలేని మనసుల కన్నీరు మిన్న

ఎవరికోసమో తెలియని జీవితంకన్నా
నీకోసమే నేనున్నాననే జీవితం మిన్న

-మీ చిట్టి, పండు

ఉగాది రుచులూ...జీవన అనుభవాలూ...

2011-04-03T17:00:00.004-04:00

ఉగాది అనగానే ప్రతి తెలుగు వారికీ ఠక్కున గుర్తొచ్చేది షడ్రుచుల మేళవింపు తో నోటికి అన్ని రుచులూ ఒకేసారి రుచి చూపే "కమ్మని ఉగాది పచ్చడి", అందులో కొంచెం వేపపువ్వే అన్నిటినీ డామినేట్ చేస్తుందండోయ్! చేదు తర్వాత పులుపూ, కొంచెం తీపీ, ఉప్పూ, వగరూ, కారం వగైరాల రుచులన్నీ ఒకేసారి కలిసి జీవిత రుచులని గుర్తుచేస్తూ చేసే సందడే "ఉగాది పండగ". ఉగాది పచ్చడి లాగే జీవితమూ అనేక భావాల సమ్మేళనం. సంతోషం, బాధా, ఆనందం, దుఃఖం, కోపం, అసూయా, ప్రేమ, ద్వేషం, అసూయ, చిరాకూ, పరాకూ వగైరా వగైరా...

ఈ ప్రపంచం ఎన్నో వింతల సమ్మేళనం. ప్రకృతి ఎన్నో ఋతువుల మరియూ ఎన్నో రంగుల కలయిక. అలాగే జీవితమూ ఎన్నో భావాల మిళితం. అందులో ప్రేమ ఒక అద్భుతమైన భావన. అది ఉన్నచోట ద్వేషం ఉండదు, కోపం ఉండదు, అసూయ ఉండదు. త్యాగం, మమత, అనురాగం ఇలా అన్ని మంచి భావనల మిశ్రమమే "ప్రేమ".

ఆ ప్రేమ ఎప్పుడు ఎలా ఎవరితో మొదలవుతుందో! ఒకసారి మొదలయ్యాక జీవితాంతం వీడక మదిలో దోబూచులాడుతూనే ఉంటుంది. ప్రేమించిన మదితో కలసి జీవితం గడపగలిగటం ఒక వరం. ఆ వరం పొందలేని హృదయాలు, ఎదో పోగొట్టుకున్నట్టు కడదాకా వెతుకుతూనే ఉంటాయి. ఆ వెతుకులాటలో ఒకసారి మనసు తెరచి చూసుకుంటే ఆ వెతికేదేమిటో కనిపించకపోదు. వెతికేది పోగొట్టుకున్న తన ప్రాణాన్నే అయినా, ఆ ప్రాణంతో కోల్పోయిన "ప్రేమ" ప్రతిబింబమూ అందులో కనిపిస్తుంది. ప్రేమ ఎదుటివారిలో వెతికితేనో, లేదా వారినుండి ఆశిస్తేనో దొరికిపోయే సులభమైన వస్తువు కాదు. అది జీవితంలో పుట్టేదీ, పెరిగేదీ, కడదాకా తోడుగ ఉండేదీ ఒక్కరితోనే.

జీవితమూ ఉగాది పచ్చడిలాగే మిశ్రమ అనుభూతుల సమ్మేళనానుభవం. అన్ని భావాలూ, అనుభవాలూ పొందిన నాడే, ఏ భావం విలువ ఏంటో తెలిసొస్తుంది. తెలిసుకొని అనుభవంతో మంచి భావాలతో ముందుకి పోగలిగితే ప్రతి రోజూ ఓ ఉగాది పండుగే.

ఈ "ఉగాది పండగ" అందరి జీవితాల్లో మంచి మంచి అనుభావాల అనుభవ సమ్మేళనంతో "ప్రేమ" ని నింపాలని ఆశిస్తూ-

-మీ చిట్టి, పండు

భారత్ ఆశలు ఫలించిన వేళ...

2011-04-02T19:38:00.001-04:00

ఈ ప్రపంచ కప్ ప్రతి భారతీయుడి హృదయంలో చిరస్థాయిగా నిలబడిపోతుంది. 28 ఏళ్ల తరువాత "టీం ఇండీయా" సాధించి "విశ్వ విజేత" గా నిలిచిన ఈ ఘనత మరువలేనిది. Hats off to Indian Team for such a great performance!.

"మాస్టర్ బ్లాస్టర్ సచిన్" కి ఈ Cup ని కానుకగా Team సమర్పిచటం క్రికెట్ ఆటనే గౌరవించిన అనుభూతి. సచిన్ లాంటి క్రికెటర్స్ క్రికెట్ చరిత్ర పుటల్లో ఎన్నటికీ మొదటి పేజీలోనే ఉంటారు. 120 కోట్ల భారతీయుల ఆశలూ, కలలూ ఫలించిన ఈ శుభసందర్భంలో ప్రతి భారతీయుడూ ఆనందంగా, గర్వంగా జరుపుకోవలసిన "విజయ పండుగ" ఇది.

Congratulations to 'Indian Cricket Team' and 'Indians' all over the world!

-మీ చిట్టి, పండు

కలిసి నింగికెగరాలని...

2011-03-29T19:30:00.003-04:00

నా గుండె నీకోసమే
తపించె అనుక్షణమూ

నా మనసున నీ మదికై
ఆరాటమే ప్రతి దినమూ

నా కళ్ళు నీకొరకై
వెతుకెను ప్రతి చోటా

నా ఆలోచనలు నీ వైపే
మరలెను ప్రతి బాటా

నా తనువూ నీ స్పర్శతొ
పులకరించి పోవాలని

నా ప్రాణం నీతోనే
కలిసి నింగికెగరాలని

-మీ చిట్టి, పండు

కనుమూసే లోపైనా...

2011-03-22T19:30:00.001-04:00

నువ్వున్నావు నాకోసం
అయినా నాకెందుకీ శోకం
తట్టుకోలేని గుండెకి పాపం
ఏదో తెలియని పరితాపం

నువ్వున్నపుడు అంతా వెలుగే
అటు వెళ్ళగనే చీకటి అలిమె
ఆ చీకటిలోనూ నిన్నే వెతికె
అలుపెరుగక రోదిస్తూ గుండె

కళ్ళెదురుగ నువ్వున్నపుడు
నిను చూస్తూ గడిపినపుడు
పరిగెత్తిన సమయం అపుడు
గుర్తుకొచ్చె మనసుకిపుడు

ఉన్నానో లేనో తెలియకనే
బ్రతుకుతున్నా ఆశల సడినే
చూడగలనా నీ నవ్వునే
కనుమూసే లోపైనా అనే

-మీ చిట్టి, పండు

మన "అభివృద్ధి" ఎటువైపు?

2011-03-12T06:16:00.001-05:00

ప్రపంచం అంతా అభివృద్ధి పధంలోనడుస్తున్న కాలంలో బానిస బ్రతుకుల నుంచి విముక్తికై బ్రిటీష్ వారితో పోరాడటానికే మన కాలం, శక్తీ అంతా సరిపోయింది. గర్వంగా ఏదో సాధించేశామని దాదాపు అర్ధ శతాబ్ధం ప్రపంచం పట్టనట్టు కళ్ళుమూసుకుని, ఇప్పుడిప్పుడే అబ్జివృద్ధి చెందుతున్న దేశాలనుంచి మంచీ. చెడూ రెండూ తీసుకుని, ఆ...మేమూ అభివృద్ధి చెందుతున్నామని చెప్పుకుంటూ మురిసిపోతున్నాం. అమెరికా లాంటి అగ్ర దేశం సైతం- ఇండియా రాబోయే తరాలకి, అభివృద్ధి చెందిన దేశాలకీ పెద్ద పోటీ అంటూ రోజూ ఎన్నోసందర్భాల్లో చెబుతూనే ఉంది.

మనం నిజమైన అభివృద్ధి పధం వైపు అడుగులు వేస్తున్నామా? లేదా, పై పై మెరుగులు చూసి మురిసిపోతున్నామా? అభివృద్ధి అంటే దేశంలో పెద్ద నగరాల్లో వెలుస్తున్న ఆధునిక కట్టడాలు, విదేశీ సంస్థలు నెలకొల్పుతున్న వ్యపారాల్లో పని చేసి బాగానే సంపాదిస్తున్నాం అనుకోవటం మాత్రమేనా?

ప్రపంచంలో ఇంకా జీవనకోటి కి నాగరికత కూడా తెలియని కాలంలో మన దేశం నాగరీకంగా ఎంతో ముందుంది అని మన చరిత్ర చాటుతూనే ఉంది. కానీ ఈనాడు మనమున్న దుస్థితి చూసుకుని మన చరిత్ర చూసి గర్వపడాలో, అది నాశనం చేసుకుంటున్న మనల్ని చూసి నవ్వుకోవాలో తెలియని అయోమయ స్థితిలో ఉన్నాం.

మన తెలుగుజాతి గర్వించేలా ఎన్నో రంగాల్లో ఎంతో కృషి చేసిన ఎందరో మహనీయులని మనం ఎప్పుడో మరచిపోయాం. నేటి తరానికి వారి పేర్లు కూడా సరిగా తెలియవు, రాబోయే తరాలకి "హ్యారీ పాటర్" తెలిసినంతగా మహా భారతమూ, రామాయణమూ తెలియవు అనటంలో సందేహమే లేదు. అలాంటి మరుగున పడుతున్న మన తెలుగు చరిత్రని తిరిగి గర్వంగా నిలబెట్టే ప్రయత్నం చేయటమే కాదు, అందులో సఫలం అయిన మహనీయులు శ్రీ యన్.టి.రామారావు. ఆనాడు ఆయన రూపుదిద్దిన హైదరాబాద్ నగరంలో నిన్నటిదాకా ఎందరినో ఆహ్లాద పరచిన మన "ట్యాంక్ బండ్" పై నిన్నటి అనాగరిక ఘట్టం మన అభివృద్ధికి ప్రశ్నార్థకంగా ఉంది.

ఇదేనా మన అభివృద్ధి? అభివృద్ధి చెందుతున్న దేశాలకు ధీటుగా మనం పోటీ పడగలమా? ఎందులో? ఈ 21 వ శతాబ్ధంలోనూ కుల, మత, ప్రాంతీయ, భాషా బేధాలతో నిత్యం రగిలిపోతూ, మన చరిత్రని మనమే కూల్చుకుని ఏదో జయించాం, సాధించాం అని సంబరపడుతూ, పిచ్చిగా చిందులు వేస్తూ చేసే ప్రవర్తన అభివృద్ధికి చిహ్నమా?

రాయిలో సైతం దైవం చూసుకుని చేతులెత్తి దణ్ణం పెట్టగలిగే గొప్పతనం ప్రపంచంలో కేవలం మన దేశంలోనే ఉంది. దేశ ఉన్నతికి పాటుపడిన మహనీయులతో సమకాలీకులుగా పుట్టలేక పోవటం దురదృష్టం. కనీసం వారు పోయాక వారి చేసిన కృషిని గుర్తుచేసుకుంటూ ప్రాణం లేని విగ్రహాలలోనైన వారిని సజీవంగా చూసుకునే భాగ్యం కలగటం అదృష్టం. అలాంటి పవిత్ర మూర్తుల విగ్రహాలని ఈనాడు కూల్చినది రాజ్యాలు కబళించి సంపద దోచుకుపోతూ పట్టుకు పోలేక కూల్చి సంబర పడ్డ ఏ పరదేశీయులో కాదు, మనమే. అభివృద్ధి చెందిన దేశాలతో అక్కడి పౌరులతో సైతం పోటీ పడగలం అని గర్వంగ చెప్పుకు తిరిగే మన తెలుగు జాతీయులమే. మన చరిత్రని మనమే కూల్చుకుంటున్నాం. నాగరికత చుట్టూ ఉన్న పరిసరాల్లో లేదు, ఆ పరిసరాల్లో కలసి జీవిచే పౌరులలో ఉంది. అభివృద్ధి జీవంలేని కట్టడాల్లో లేదు, జీవమున్న మన ప్రవర్తనలోనే ఉంది.

"దేశమంటే మట్టికాదోయ్...దేశమంటే మనుషులోయ్..." అన్న గురజాడ గారి మాటల్లో ఎంతటి సత్యముందో నిన్నటి మన "ట్యాంక్ బండ్ ఘట్టం" నిరూపించింది.

ఇన్నేళ్ళూ జరుగుతున్న అభివృద్ధినీ, తెలుగుజాతి ఎదుగుదలనీ చూసి సంబరపడుతూ నగరం నడిబొడ్డున కొలువై ఒకప్పుడు జీవంలేని ఆ జలాశయానికి జీవం తెచ్చి ఎందరినో ఆహ్లాద పరుస్తూ కళ కళ లాడిన తెలుగు మహనీయులు ఇక మా తెలుగువారి అభివృద్ధిని చూడలేం అంటూ వారి చేతుల్లోనే నేలకొరిగి నేడు నిజంగా అమరులయ్యారు.

"If you admire kings and Emperors for historical constructions like Golkonda and Charminar in Hyderabad, you should also admire NTR for bringing in monuments of Great Telugu Personalities on the TankBund."

"దేవుడా రక్షించు నా దేశాన్ని. ఈసారి శతృనేతల బారినుంచి కాదు, నా దేశ పౌరుల దాడి నుంచే"

-మీ చిట్టి, పండు

నీతో క్షణమైనా

2011-03-08T19:30:00.001-05:00

నీతో గడిపిన కాలం క్షణమైనా
అది మదిలో చెరగని ప్రియ యుగమే
నీతో చెప్పుకున్న ఊసులు కొన్నైనా
అవి ఎదలో తరగని మది సంపదలే

మాటల్లో చేప్పని ఎన్నో భావాలని
నా కనులలో నీ రూపంతో చేప్పాలని
చేతులు తాకని ప్రతి స్పర్శని
నామదితో స్పృశించి తరించాలని

ఏవైనా ఎన్నైనా అవి నీతోనే అని
కొన్నైనా కొంతైనా నిను చేరాలని
తపనపడే మది మూగ భావాలని
తాకే ఆ మధురం ఉందో లేదోనని

ప్రతి క్షణమూ నువ్వే కావాలని
ప్రతి యుగమూ నీతో ఉండాలని
ఆరాటపడే ఈ చిన్ని గుండెకైనా
తెలిసేనా అది ఆశయని ఎప్పటికైనా

-మీ చిట్టి, పండు

ప్రియ రాగాలు

2011-03-01T18:30:00.004-05:00

హృదయం ద్రవించటమే కాదు
కన్నీళ్ళ తడి స్రవించటమే కాదు
ఆనంద వడిలో పరవశించగలదు
సంతోష సడిలో మురిసిపోగలదు

మనసైన చెలి మదినిండుగ ఉండగ
ఎదురై నవ్వుతు పువ్వులు పూయగ
మెరిసే మేని ఛాయ కాంతులు చిందగ
వలపుల తలపులతో మది తడవగ

రాగం గానం గొంతున స్వరమే కాదు
హృదయ గళమూ వినిపించగలదు
శ్రావ్యంగా వినిపించే పాటలా కాదు
తీయని మూగ మధురిమల బాటలా

పెరిగే ప్రేమరాగంతో
తరగని అనురాగంతో
నిత్యం మది చెలి గానాలే
అనునిత్యం ప్రియరాగాలే

-మీ చిట్టి, పండు

నీ రాక కోసం

2011-02-22T18:30:00.001-05:00

నీ రాక కోసం
వేచి ఉన్నా

ప్రతి ఉదయమూ..ప్రతి సాయంత్రమూ..
ప్రతి పగలూ..ప్రతి రేయీ..
ప్రతి ఘడియా..ప్రతి క్షణమూ..
ప్రతి ఋతువూ..ప్రతి వసంతమూ..
ప్రతి తలపూ..ప్రతి వలపూ..
ప్రతి శ్వాసా..ప్రతి ఆశా..
ప్రతి చోటా..ప్రతి బాటా..
ప్రతి కలా..ప్రతి కోరికా..
ప్రతి పున్నమి..ప్రతి జన్మని

-మీ చిట్టి, పండు

అర్థం లేని "ప్రేమ త్యాగం" వ్యర్థం

2011-02-08T18:00:00.002-05:00

జీవితం - ఒంటరి ప్రయాణం కాదు. ఎందరితోనో కలసి చేసే అనుభవాల ప్రవాహం. ఒంటరిగా అందులో ప్రవేశించినా, ప్రవేశించిన క్షణమే ఎన్నో బంధాలు చుట్టూ పెనవేసుకుకు పోతాయి, పెనవేసుకుని, ప్రవాహంలో మనతో ముందుకి నడుస్తాయి. ముందుకి నడుస్తాయే తప్ప కడదాకా మనతో ముందుకి పోలేవు. ఎక్కడో ఒకదగ్గర ప్రతి బంధం తన మజిలీ వచ్చినపుడు చెప్పకనే దిగిపోతుంది.

త్యాగం - జీవితంలో ప్రతిఒక్కరూ ఎప్పుడో ఒకప్పుడు ఏదో ఒకటి త్యాగం చెయ్యక తప్పదు. ఆ చేసే త్యాగం వల్ల మరెవరికైనా మంచి జరిగితే ఆ త్యాగంకి అర్థం, పరమార్థం రెండూ ఉంటాయి. కానీ చేసిన త్యాగం వల్ల చేసిన వ్యక్తి నష్టపోతే అది త్యాగం అనిపించుకోదు. ఒకరికి నష్టం కలిగి, ఇంకొకరికి లాభం కలిగేదేదీ త్యాగం ఎన్నటికీ కాదు. కేవలం త్యాగం చేశామన్న అపోహ మాత్రమే.

ప్రేమ - జీవన ప్రవాహంలో బంధం లేకనే కలిసే అనుబంధం. బంధంలా దానికి పుట్టుకతో పేరులూ ఉండవు. ప్రతిష్టలు అంతకన్నా ఉండవు. ఉన్నదల్లా కడదాకా కలసి ముందుకి నడవగలను అన్న నమ్మకం ఒక్కటే. కేవలం ఆ నమ్మకమే ప్రేమని పుట్టిస్తుంది. పుట్టించి విడదీయ రాని అనుబంధంతో పెనవేసుకు పోతుంది. ఇలా బంధం, అనుబంధం మధ్య నలుగుతూ ఏదీ తేల్చుకోలేక నలిగిపోయి బంధం కోసం ప్రేమని త్యాగం చేసే చిన్ని హృదయాలు ఈ జీవన ప్రవాహంలో ప్రతి ఒక్కరికీ ఎదురవుతాయి.

ప్రేమ త్యాగం - కని పెంచిన బంధం కోసమో, పరువు ప్రతిష్టల కోసమో, మరెవరి కోసమో ప్రేమించిన మనసుని వీడి జీవిత ప్రవాహమంతా మనసులేక ముందుకి నడిచే హృదయాలకి, ఏ బంధమూ, పరువూ, ప్రతిష్టా కడదాకా తోడు రావు. కడదాకా తోడై ఉండేది కేవలం మనసే. మనసైన మనిషితో కలసి చేసే జీవన ప్రయాణం ఎప్పుడూ ఆహ్లాదమే. మనసుకి నచ్చినవి పొందగలిగిన నాడే అది ఆహ్లాదం. మనసు కోరి ఎంచుకున్న మరో మనసు జీవితం పంచుకోటానికి "యోగ్యత" గలదైతే ఆ మనసుతో మనుగడ తప్పకుండా బంధం ఎంచిన మనిషితో కన్నా ఆహ్లాదంగా సాగుతుందన్నది జీవిత సత్యం. ఇది గ్రహించని హౄదయాలు ప్రేమని త్యాగం చేస్తున్నామని భ్రమ పడి జీవన ప్రవాహంలో నిత్యమూ నలిగిపొతూ ఆహ్లాదం చేసుకోవలసిన జీవన ప్రయాణాన్ని చేతులారా బాధామయం చేసుకుంటాయి. ఎందుకిలా చేసుకున్నాము అని గ్రహించి తెలుసుకునే లోపు జీవితం చేయి దాటి మరొకరి చేతుల్లోకి వెళ్ళిపోతుంది.

జీవితం చాలా చిన్నది, ఎంతో విలువైనది. ఒక్క క్షణం పోయినా వెనక్కి రానంత చిన్నది. పోయిన క్షణం ఎన్నటికీ తిరిగి పొందలేనంత విలువైనది. ఇంత విలువైన జీవితాన్ని ఆనందమయం చేసుకోవటం తెలియక చేసిన పొరబాటు ఆలస్యంగా తెలుసుకుని "ఎవరికోసం నా జీవితాన్ని త్యాగం చేశాను" అన్న ఆలోచన వస్తే జీవితాంతమూ అది దహించక మానదు. కని పెంచిన తలిదండ్రులు, ఆదరించిన బంధువుల ఋణం తీర్చుకోవటం బాధ్యతే, ఆ ఋణం మరో జీవితం పణంగా పెట్టి మాత్రం కాదు. తలిదండ్రులు ఎన్నడూ బిడ్డలనుంచి త్యాగం ఆశించరు, బిడ్డల సుఖమే కోరుకుంటారు. ఆ సుఖం మనసుకి నచ్చిన మనసుతో వస్తుందన్న సత్యం తెలిసినా, తెలియనట్టే ఏదో పెద్దరికం, పరువూ, ప్రతిష్ట అంటూ అర్థం లేని భేషజాలతో పిల్లల జీవితం బాధామయం చేసి చివరికి తమనూ బాధించుకుంటారు. అంత బాధలోనూ తామేదో సాధించామని మభ్యపెట్టుకుంటూనే ఉంటారు. మనిషి మనిషికి జీవితాంతమూ తోడై ఉండటనికి కావలసిన ఏకైక అర్హత ప్రేమ. కోరుకున్న మనసుని ప్రేమగా చూసుకోగలిగే ప్రతి మనసుకీ ఆ అర్హతా, యోగ్యతా మెండుగా ఉంటాయి.

భేషజాలకు పోయి కన్న బిడ్డల జీవితాలని తమ పెద్దరికంతో శాశించక, ఆలోచించి వారు కోరుకున్న మనసు "యోగ్యత" గలదైతే ఆ "చిన్ని హృదయాలని" ఆదరించి ఒక్కటి చేసి, తమ కోసం బిడ్డలు తమ జీవితాన్ని పణంగా పెట్టి కోల్పోయిన ఆనందం తెచ్చుకోలేని స్థితిలో వారిని చూస్తూ గడపక, తెలియక ఆ చిన్ని హృదయాలు ఎదో "ప్రేమ త్యాగం" చేసి తలిదండ్రుల ఋణం తీర్చుకున్నామని భ్రమపడి జీవితం బాధామయం చేసుకునే పొరబాటు తమవల్లేనని, వారి జీవితం ఆనందమయం చేసుకునే అవకాశం వారికిచ్చి తమున్నా, లేకున్నా కోరిన జీవితం పిల్లలకివ్వగలిగామన్న తృప్తి అందరికీ కలిగించాలని మా "చిన్ని ఆశ".

తలిదండ్రులూ! ఈ జీవన ప్రవాహంలో మీ పిల్లలకి కోరిన భవిష్యత్తుని ఆలోచించి వారికి ప్రసాదించండి.

చిన్ని హృదయాలూ! మీ "ప్రేమ త్యాగం" అర్థం లేనిదని, తొందరపడి తీసుకునే నిర్ణయంతో మీరు కోల్పోయేది మీ జీవితమే అని గ్రహించండి.

అప్పుడే అందరి జీవితాలూ అనందమయం.

"జీవితం ఎంతో అందమైనది." ఎవరి జీవితం వారే ఆనందమయం చేసుకోగలగాలి. అపుడే ఏ ఒక్క "చిన్ని ఆశ" కూడా తీరని పెద్ద ఆశగా చివరివరకూ మిగిలి పోదు.

-మీ చిట్టి, పండు
P.S.: ఇవి కేవలం మా అనుభవాల ప్రేరణతో కలిగిన ఆలోచనలు మాత్రమే. చదివిన ఏ ఒక్క కన్న హృదయమో లేదా ఏ ఒక్క చిన్ని హృదయమో అర్థం చేసుకుని ఆచరించగలిగి తమ జీవితం ఆనందమయం చేసుకోగలిగితే మా "చిన్ని ఆశ" ఫలించినట్టే.

తుది శ్వాసతొ నీ ఒడిలో...

2011-01-25T19:30:00.005-05:00

విరబూసిన మల్లె
పువ్వు తెల్లదనం
అరవిరిసిన చెలి
నవ్వు చక్కదనం
స్వచ్ఛమైనవే రెండూ...

ఆకాశంలో వెలిసిన
రంగుల హరివిల్లు
చెలి ఒడిలో కరిగిన
ఆశల చిరుజల్లు
అందనివే రెండూ...

గాలిలో విరాజిల్లే
పూలగంధాల పరిమళం
మదిలో శొభిల్లే
చెలి సుమధురగళం
కమ్మనైనవే రెండూ...

పున్నమి జాబిలి
పండు వెన్నెల
వన్నెల నా చెలి
నిండు కన్నుల
అందమైనవే రెండూ...

ఉదయ భానుడి
లేత కిరణం
హృదయ బాంధవి
ప్రేమ వదనం
ప్రకాశమైనవే రెండూ...

వినిపించే ప్రతి
తియ్యని కోయిల సడి
లాలించే సుతి
మెత్తని నాచెలి ఒడి
పరవశమే రెండూ...

స్వచ్చమైన నీ నవ్వు కావాలి
అందని నా నువ్వూ కావాలి

కమ్మనైన నీ గళం వినాలి
అందమైన ఆ వన్నెలూ కనాలి

కాంతి వదన ప్రకాశంతో నా మది వెలగాలి
తుది శ్వాసతొ నీ ఒడిలో పరవశించిపోవాలి

-మీ చిట్టి, పండు

నాడు నడవని కాలానికి నేడు పరుగులెందుకో...

2011-01-18T19:30:00.019-05:00

మనసులో ఆకాశమంత ఆశలతో
గుండెల్లో భూదేవంత భారంతో
చెలి రాకకై వేచి చూసిన నాడు
క్షణమైనా ముందుకి నడవని కాలం...

ఆశల ఆకాశం కనుల ముందు నిలవగా
భారం కరిగి గుండె గాలిలో తేలగా
వేచి చూసిన క్షణం చెలి రాకతొ రాగా
నేడు పరుగులు పెడుతుందెందుకో...

-మీ చిట్టి, పండు

మరు జన్మకై ఇపుడే వేచి...

2011-01-11T12:02:00.000-05:00

కనులారా నిను చూడాలనున్నా
కళ్ళల్లో నీ రూపం తో సరిపెట్టుకున్నా

మనసారా నీతో మాటలాడాలనున్నా
మదిలోనే మూగవోయిన భావాలు దాచుకున్నా

మధురమైన నీ స్వరం వినాలనున్నా
గుండెల్లో ఆ పిలుపు జ్ఞాపకం స్మరించుకుంటున్నా

ఎనలేని ప్రేమని నీకే ఇవ్వాలనున్నా
ఇవ్వలేని నిరుపేదని చేసిన విధిని నిందిస్తున్నా

ఇంకా ఎవరికోసమో తెలియక బ్రతికే ఉన్నా
మరు జన్మలో నీకై ఇపుడే వేచి ఉన్నా

- మీ చిట్టి, పండు

నూతన సంవత్సరం...నిత్య నూతనం చేసుకో...

2010-12-31T09:00:00.001-05:00

మనసైన మనసుతో కలిసి నూతన ఆశలతో ప్రేమగా కొత్త సంవత్సరానికి స్వాగతం పలకాలనుకుని ఆశపడే మనసులు ఎన్నో. ఇలా ప్రతి సంవత్సరం వచ్చే కొత్త ఏడాది మొదటి క్షణం ప్రియమైన సమక్షంలో ప్రేమగా గడపగలిగే అవకాశం అందరికీ దక్కదు.

ఫ్రెండ్స్ తో సరదాగా నో, లేదా TV చూస్తూనో గడిపేయటం ఉత్సాహమే, అయినా చాలా రొటీన్ గా అనిపిస్తుంది కదూ! మారిన ప్రపంచంలో రోజూ రొటీనే. ఏదో మెకానికల్ గా రోజంతా రొటీన్ గా దొర్లిపోవటం, అలసి నిద్రపోవటం, లేచి మళ్ళీ కాలంతో పరుగులెట్టటం... అయినా సంవత్సరం చివరికొస్తుంటే మళ్ళీ నూతనోత్సాహం పుట్టుకొస్తుంది. ఏదైనా సాధించాలనే తపనా మొదలౌతుంది. చాలా మందికి నూతన సంవత్సరంలో మొదటి రోజున్న ఆ ఉత్సాహం అన్ని రోజులూ ఉండదు. అదే "నూతన సంవత్సరం" మహిమ.

నూతన సంవత్సరం, మొదటి రోజు, మొదటి క్షణాలు చాలా ఉద్వేగ భరితమైనవి. అందరి మనసులూ నూతనోత్సాహంతో ఆనందంగా ఉరకలు పెడుతుంటాయి. ఆ ఆనందం, ప్రియమైన సమక్షంలో జరుపుకోలేకపోయామనే అని కలతపడే హృదయాలూ ఉంటాయి. అలాంటి హృదయాలు ఆ మొదటి క్షణాలు ప్రియమైన సమక్షంలో లేమని వేదన పడక, ఆ ప్రియమైన మనసుని ఒక్కసారి ప్రేమగా తలచుకుంటే, ప్రేమించిన ఆ హృదయానికి ఎక్కడున్నా ఆ స్పందన చేరితీరుతుంది. మీ ప్రియ సమక్షం నూతనోత్సాహంగా మీ హృదయాల్లో నిత్య నూతనంగా సంవత్సరం అంతా విరాజిల్లుతుంది.

ఈ నూతన సంవత్సరం అందరి మనసుల్లో ప్రియమైన మనసుని నిత్యనూతనంగా ఉంచాలని ఆశిస్తూ...

నూతన సంవత్సర శుభాకాంక్షలతో
- మీ చిట్టి, పండు

కన్నీటి కిరణం

2010-12-28T19:30:00.015-05:00

నీ చెంత
వెలుగులతో
శోభిల్లిన
ప్రేమ దీపం
నెవ్వెళ్ళాక
గుండె గుడి
చీకటిలో
కన్నీటి
జ్ఞాపకాల
కిరణాలతో
శొకిస్తూనే ఉంది...

- మీ చిట్టి, పండు

నిన్నెవరని అనను?

2010-12-21T19:30:00.007-05:00

ప్రాణ స్నేహితుడననా
నీకంటే ప్రాణమెక్కువేమీ కాదే

మరువలేని తీపి జ్ఞాపకమననా
ఎప్పుడూ మది వీడనేలేదే

నా శ్వాస అందామంటే అది
ఆగినా నాతోనే వుంటానన్నావే

ఈ చిన్ని గుండెని ప్రేమించే
మరో చిన్ని గుండెవననా

నను అపురూపంగా చూసుకునే
నా మనసెరిగిన నా మురిపెమననా

నాలో భాగమైపోయి నీ చేయి నుంచి
జాలువారిన నీ బొమ్మవననా

నిన్ను నువు దాచుకోలేక నా వొడిలో
ఒదిగిపోయే నా చిన్ని నేస్తమననా

కొండంత నమ్మకాన్ని నీపై పెంచుకున్న
నను గుండెల్లోనే దాచుకున్న నా ప్రాణమననా

నేనున్నానంటూ అమాయకంగానే నమ్మకంతో
చెప్పే నెనెరిగిన నా ప్రియ నేస్తమననా

నే కలత చెందితే కన్నీరు పెట్టే
ఏ కల్మషమూ లేని పసి హృదయమననా...

- మీ చిట్టి, పండు

నాడు నీవే...నేడు నీకే

2010-12-14T19:30:00.011-05:00

నాడు కనుముందున్నా చెప్పలేని ప్రేమ
నేడు కనుమరుగైనా చెప్పాలని తపన

నాడు కలవాలనున్నా కలవలేని పరిస్థితి
నేడు కలవలేని కలవాలనున్న దుస్థితి

నాడు నీ కళ్ళల్లో కన్నది నన్నే
నేడు నా గుండెల్లో దాచుకున్నది నిన్నే

నాడు నీ నవ్వుల్లో పువ్వులు చూశా
నేడు పువ్వుల్లో నీ నవ్వులకై వెతికా

నాడు నీ ఊహల్లో రేపుని తలచా
నేడు నీ స్మృతుల్లో నిన్నకై వగచా

నాడు నీ వడి లో కరిగిన కాలం
నేడు బరువై కదలని అను క్షణం

నాడు విధి వరించి కలిపిన మనసులు
నేడు అది వంచించి విడదీసిన బ్రతుకులు

నాడు బంధాలకి తలవంచిన హృదయాలు
నేడు అనుబంధానికై విలపించే గుండెలు

నాడు బ్రతుకున నిరాశల కన్నా
నేడు జీవితాన ఆశలు సున్నా

అయినా నాడూ నేడూ-
మది నిండా నీవే, తుది శ్వాసా నీకే...

- మీ చిట్టి, పండు

ప్రియా నిను చూడలేక

2010-12-07T19:30:00.007-05:00

అన్నీ నీవై వున్నానన్నావు, నను తాకే గాలి నడిగాను నీ జాడేదని
నువు ఆదమరిచి వుండగా చూసి చూసి వెళ్ళావని చెప్పింది ఇక రాడని

కాదు పొమ్మని రివ్వున గాలి కెగిరే పక్షినడిగా, నా నేస్తం ఎక్కడని
విడిచిన చోటే వెతకమని తుర్రుమంది నీ దశగా

జాబిలి తోడుగా నీకై వచ్చా వడివడిగా
నిశ్శబ్ధపు నిశీధి జాలి గా చూసి నవ్వింది నువ్వు లేవని

నమ్మను లెమ్మని అడిగా, నిన్నే ప్రియా కడదాకా తోడుంటానన్నావని
పంచభూతాలు కాదన్నా నాకు తెలుసు నీవుంటావని

నిన్నే మదిలో దాచుకొని కోటి ఆశలతో నీకై వేచి నేనుంటానని
నాకొసం పూలగంధాలతో వస్తావని
నీ గుండెకోటలో దాచుకుంటావని

చిన్ని ఆశతో
- మీ చిట్టి, పండు

ప్రేమ కన్నీళ్ళు

2010-11-30T19:30:00.004-05:00

చెలి రూపం కళ్ళల్లో
కాపాడేది మేమంటూ
రెపరెపలాడెను రెప్పలు

రెప్పలలసి మూసే వేళ
చెలి నాలో పదిలమె అంటూ
పొంగిపోయెను గుండెలు

చెలికై గుండెల వేదనలో
స్రవించటం మావంతంటూ
చెమరించెను కన్నులు

రెప్పలు, కళ్ళూ, గుండెలు ఉండగ
చెలి హృదయం తాకెదనంటూ
మురిసి మెరిసెను మనసు

- మీ చిట్టి, పండు

బంధం..అనుబంధం

2010-11-23T19:30:00.010-05:00

చేతిలో చెయ్యి వేసి
ఎంత దూరం నడిచినా
ఏడడుగులు నడిస్తేనే బంధం

మనిషీ మనిషీ కలసి
ఎంత కాలం బ్రతికినా
మనసులు కలిస్తేనే అనుబంధం

విధి ముడి వేసేది బంధం
మది పెన వేసేది అనుబంధం

తుదిలో ముడి వీడి పోయేది బంధం
మదిలో ముడి వడి ఉండేది అనుబంధం

- మీ చిట్టి, పండు

ఎక్కడ నా హృదయం...

2010-11-16T19:30:00.002-05:00

ఒంటరిగా నన్ను విడిచి
నా హృదయాన్ని తీసుకెళ్ళిన
నిను ఎక్కడని వెతకను

ప్రేమతో రాసుకున్న అక్షరాల్లోనా
కలసి తిరుగాడిన ప్రదేశాల్లోనా
చెప్పుకున్న కమ్మని ఊసుల్లోనా

అందంగా దోబూచులాడే ఆలోచనల్లోనా
మరపురాని తీయని తలపుల్లోనా
తలపించే స్వచ్ఛమైన నీ నవ్వుల్లోనా

వదిలి వెళ్ళిన నీ జ్ఞాపకాల్లోనా
హృదయంలో నిదురించే నీ కలల్లోనా
నిత్యం మనసు చేసే అలజడుల్లోనా
అనునిత్యం విలపించే నా గుండె లోతుల్లోనా

- మీ చిట్టి, పండు

తుది వరకూ తోడై...

2010-11-09T20:30:00.005-05:00

గుండెల్లో భావాలన్నీ
లోతుల్లో ఉండిపోయాయ్
నువు లేవని దూరంగా
ఇక రావని భారంగా

కన్నుల్లో నీ రూపం
కన్నీళ్ళుగ కరిగిపోయె
రెప్పల మాటున కలకలం
ఎదురు చూసి ఇంతకాలం

మదిలో తుది ఆశ కూడా
మోడై వాడి పోయె
ఈ జన్మకి ఇక నిన్ను
చూడలేనని నిరాశ తో

అయినా ఒక "చిన్ని ఆశ"
ఎక్కడనో దాగి ఉంది
నీ తోడై ఉన్నానంది
తుదిశ్వాసలొ ఉంటానంది

- మీ చిట్టి, పండు

చీకటి వెలుగుల రంగేళీ...

2010-11-04T20:30:00.007-04:00

విరజిమ్మే వెలుగులతో చీకటిని పారదోలుతూ పిల్లలూ, పెద్దలూ అందరూ కలసి పిల్లలై జరుపుకునే వెలుగుల పండగ దీపావళి.

ఆనందపు వెలుగులు మనసున నింపుకోగలిగితే బ్రతుకున చీకటినీ పారదోలినట్టే. చీకటి కమ్ముకున్న మనసుల్లో ప్రేమ వెలుగులు నింపితే చుట్టూ చీకటి ఉన్నా వెలుగుని చూడగలం.

వెలుగు విలువ తెలిపేది చీకటి
ఆనందం విలువ తెలిపేది బాధ
ప్రేమ విలువ తెలిపేది ఎడబాటు

కోరిన మనసు దగ్గరుంటే జీవితం రోజూ వెలుగుల దీపావళే
చెలి గల గల నవ్వులలో మతాబుల సంతోషాల సరావళే
చీకటి హృదయంలో ప్రేమ వెలుగు జిలుగుల ఆనందకేళే

దీపావళి శుభాకాంక్షలతో
- మీ చిట్టి, పండు

జ్ఞాపకాల మధురిమలు

2010-11-02T20:30:00.004-04:00

జీవితం ఒక జ్ఞాపకాల ప్రవాహం. నదీ ప్రవాహంలా ఎన్నో అనుభూతులనూ, అనుభవాలనూ తనలో నింపుకుంటూ కడదాకా ముందుకి సాగిపోతూనే ఉంటుంది. ఆ జ్ఞాపకాల ప్రవాహంలో ఎదురీదే చేదు జ్ఞాపకాలు కొన్నైతే, ప్రవాహంతో పరవళ్ళు తొక్కుతూ వడిగా సాగే మధుర జ్ఞాపకాలు మరి కొన్ని.

“ప్రేమ ఎంత మధురం ప్రియురాలు అంత కఠినం…” అన్న ఆత్రేయ గారి పదలయలా ప్రేమ ఎప్పుడూ ఎంతో మధురం. గుండెల్లో దేవతలా దాచుకున్న ప్రియురాలు వీడి పోయిందన్న భ్రమ, నిరాశే నిజానికి కఠినం, ప్రియురాలెన్నటికీ కాదు. జీవితాన్ని ప్రేమతో నింపి అందమైన అనుభూతులనెన్నో మదిలో నింపిన ప్రియురాలి జ్ఞాపకాలతో ఆనందంగా గడపగలిగితే జీవితం నిత్యమూ మధురమే అనునిత్యమూ పులకింతలు తొక్కి పరవశించే నదీ ప్రవాహమే.

జీవన వాస్తవాలు మధురం ఎప్పుడో…
ప్రేమ జ్ఞాపకాలు మధురమే ఎప్పుడూ…

- మీ చిట్టి, పండు

ఎన లేని నమ్మకమే...ప్రేమ

2010-10-27T21:30:00.003-04:00

ఒక్కో పాటకీ ఒక్కో రాగం ఉన్నట్టే, ఒక్కో హృదయానికీ తోడై స్పందించే ఇంకో హృదయమూ ఉంటుంది. పాటకి పల్లవి ప్రాణం అయితే, హృదయానికి స్పందన జీవం. స్పందించే హృదయాలు దగ్గరైతే పుట్టే హృదయ రాగంలో అవి పరవశిస్తాయి.

చిట్టి, పండులు నిజానికి వేరు వేరు హృదయాలైనా ఒకే భావాలకూ, అనుభూతులకూ ఎకమై ఒకే విధంగా స్పందించే రెండు చిన్ని గుండెలు.

ఒకసారి చిట్టిని చిట్టి మనసే ఇలా ప్రశ్నించింది “చిట్టీ, పండంటే నీకెందుకంత ఇష్టం? పండులో వున్న గొప్పేంటి? ఏం చూసి ప్రేమించావు?” అని.

చిట్టికి అలాంటి ప్రశ్న ఇదివరకెన్నడూ రాలేదు. ఎందుకంటే అసలు ఇంతవరకూ ప్రేమా, పండూ వేరని, అలాంటి ప్రశ్న ఒకటి ఉంటుందనీ ఊహించనే లేదు. సరే ఎలాగూ ఆ ప్రశ్న వచ్చే సరికి కాస్తంత దీర్ఘంగానే ఆలోచించింది… “ఎందుకబ్బా…” అని.

. అందంగా వుంటాడనా? ఏదో తెల్లగా పొడుగ్గా బానే వుంటాడు కానీ
మరీ మహేష్ బాబు లా ఏం కాదు (ష్… మా పండుకి చెప్పకండి ఈ విషయం)
. నాగార్జున లా రొమాంటిక్ గా? (?)
. పవన్ కళ్యాన్ లా నవ్విస్తాడా (డెఫినిట్ గా)
. మగధీర లా జన్మ జన్మలకీ తోడుగా వస్తాడా? (అనే చెప్తాడు)
. పొనీ కనీసం డాన్ శీను లా (వద్దు లెండి)?
…ఇలా ప్రశ్నించుకుంది.

ఇవన్నీ కాదు గానీ, మరి దేనికి అని ఆలోచిస్తే...
వీటన్నిటి కన్నా మించినదీ, పండులోని అన్ని గుణాల కన్నా గొప్పదీ, చిట్టి కిష్టమైన, తనని పండుకి చేరువ చేసిన ఆ గుణం “నమ్మకం”.

పండంటే చిట్టికి ఎనలేని నమ్మకం. పండుని తలుచుకోగానే చిట్టి కి గుర్తొచ్చే మొదటి మాటే “నమ్మకం”. చిట్టి ఎన్నడూ పండు నా కోసం వస్తాడా, అని క్షణం కూడా ఆలోచించనేలేదు. వస్తాడనే, వుంటాదనే ఎప్పుడూ నమ్మింది. అందుకే దశాబ్ధాల తరబడి పండు కోసం ఆ నమ్మకంతోనే ఎదురు చూసింది.

నమ్మకం లేని చోట ప్రేమ లేదు. ప్రేమ, నమ్మకం చిట్టి పండుల్లా కలిసే వుంటాయి. స్నేహంతో మొదలైన ఆ నమ్మకం వారి ప్రేమకు గట్టి పునాది వేసి పెంచి పెద్దది చేసింది. unfortunately, చిట్టి పై పండుకి అంత నమ్మకం లేక చిట్టి మనసు గ్రహించలేక వద్దంటే దూరంగా వెళ్ళిపోయాడు. అయినా ఆ నమ్మకం తోనే పండు ఏ నాటికైనా తనకు దగ్గర అవుతాడని చిట్టి “చిన్ని ఆశ” తో ఎదురు చూస్తూనే ఉంది….

చిట్టికి ఎక్కడో ఎప్పుడో చదివిన చిన్ని జ్ఞాపకం...

“పదాల మాయ ప్రేమ కాదు
స్వరాల వునికి ప్రేమ కాదు
నిధి లాంటి నవ్వు ప్రేమ కాదు
మది లో మొదలై వేయి జన్మలకైనా
నువ్వే కావాలి అనే అంతర్వేదనే ప్రేమ
దాన్ని అర్పించే వాడే ప్రేమికుడు...”

తన పండు అలాంటివాడేనని చిట్టి కి గట్టి నమ్మకం.
తన నమ్మకమెన్నటికీ వమ్ము కాదని, తన పండు ఎప్పటికైనా తనని చేరుకుంటాడని, పండు పై తనకున్న నమ్మకంతో ఎన్నో “చిన్ని ఆశలతో” ఎప్పటికీ చిట్టి ఎదురు చూస్తూనే ఉంది….

చిట్టి నమ్మకం, ఎదురు చూపులు, చిన్ని ఆశలు ఫలించాలని మనసారా ఆశిస్తూ….

- మీ చిట్టి, పండు

నీ కోసం

2010-10-22T20:30:00.002-04:00

ప్రియతమా!
నీ గుండెలు చీల్చి, నిన్ను గాయ పరిచి దూరంగా వెళ్ళాననుకున్నా
నిన్ను కోరిన మనసుని అర్థం చేసుకొని వెతుక్కుంటూ వస్తావనుకున్నా
నా మాటల్లోని కఠినత్వమే చూశావు
నీ కోసం తపిస్తున్న హృదయాన్ని చూడలేక పోయావు
చిరుగాలిలా వచ్చి పూల గంధాలు తెస్తావని చూశా
కానీ తుఫానులా వచ్చి నమ్మకం కరువై నిందించావు
అయినా ఒక్కసారి ఒకేఒక్కసారి
నీ వాడినే అంటావని చివరి దాక ఎదురు చూశా
అప్పటికీ, ఇప్పటికీ నీదే ఈ మనసని తెలుసుకో
నిను చేరాలని ఆరాటపడి నిను చేరగలననే చిన్ని ఆశతో
నీ కోసం ఎదురుచూస్తూ.....

- మీ చిట్టి, పండు

ఏ స్వేచ్చ లేని నేను

2010-10-12T21:30:00.013-04:00

స్వేచ్చగా ఎగిరే పక్షినైనా
నీ ముంగిట వచ్చి వాలిపోదును

వీచే చల్లని గాలినైనా
నీ ముంగురులు తాకి మురిసిపోదును

నీ తోటలో విరబూసే పువ్వునైనా
నీ జడలో ఒదిగి పరవసిద్దును

నువు నడిచే బాటలో ధూళినైనా
నీ పాదం సోకి పులకరిద్దును

ఏ స్వేచ్చా లేని మనిషినయ్యాను
నీ హృదయం తాకి ధన్యుడనయ్యాను

- మీ చిట్టి, పండు

నువ్వొస్తానంటే మేమొద్దంటామా

2010-10-05T21:30:00.000-04:00

చిరు చిరు జల్లులతో మురిపించి, తడిపించే ముత్యాల వానంటే ఎవరికి ఇష్టం వుండదు చెప్పండి , అందుకే కవులు వర్షాన్ని అనేక రకాలుగా అందంగా వర్ణించారు. మరి చిట్టి, పండు లకి కూడా వానతో ఎంతో అనుబంధం ఉంది. మొట్ట మొదటిసారి వాళ్ళు కలిసి చేసిన ప్రయాణం వర్షం తోనే మొదలయ్యింది.

వాన లో ఎన్ని రకాలో కదా, తొలకరి జల్లులు, చిరు జల్లులు, తుంపరలూ, గాలి వాన, జడి వాన, ఉరుములతో పిడుగులతో వాన, ఇంకా తుఫాన్, చివరికి తనలో కలుపుకునే సునామీ... ఇంకా ఎన్నెన్నో, కానీ దేనికదే. ప్రతి వానా ఒక్కో రకం భావానికి అద్దం పడుతూ వుంటుంది కదూ!

అందరి కధల్లానే తొలకరి జల్లులా మొదలైన చిట్టి, పండుల ప్రేమ కూడా, ఎన్నో ఆనందపు అనుభవాలను మిగుల్చుకుంటూ జడివానలా తగ్గకుండా సాగింది. కానీ గాలివానలో గట్టిగా నిలువలేక రెండుగా చీలిపోయింది. ముసురులా విడువకుండా వెంట వస్తుందని ఆశించారు. కానీ వర్షమే రాక ఎన్నో వర్షాలు (సంవత్సరాలు) కాలంలో కలిసి పొయాయి. కానీ ఎన్నాళ్ళకైనా వర్షం రాక ఆగదుగా అందుకే మళ్ళీ అనుకోకుండా చిరుజల్లులా కలిసారు, కానీ అప్పటికే దట్టమైన మబ్బులతో మొదలైన తుఫానుని తట్టుకోవటానికి గట్టి ప్రయత్నమే చేస్తున్నారు. ప్రయత్నం ఎలా ఫలిస్తుందో కాలమే చెప్పాలి.

"ఆకాశ వీధిలో
హాయిగా ఎగిరేవు
దేశ దేశాలన్ని
తిరిగి చూసేవు
ఏడ తానున్నాడొ...
జాడ తెలిసిన పోయి రావా
అందాల ఓ మేఘ మాలా..."

అంటూ ఒకరి కోసం ఒకరు వెతుక్కుంటూ చిన్ని ఆశలతో,
నిరాశలను కూడా ఆశలుగా భావిస్తూ "Life is Beautiful" అనుకుంటూ ఉన్నారు.

వాళ్ళ "చిన్ని ఆశలు" నిరాశలుగా మిగలకూడదని భావిస్తూ...

- మీ చిట్టి, పండు

చెలి జాడెక్కడ?

2010-09-28T20:30:00.008-04:00

విరబూసే మందారం నేడు చిన్నబోయె
చెలి పెదవులపై చిరు నవ్వులు చిందలేదనా

పరవశించి పాడే కోకిల గానం ఆగిపోయె
చెలి స్వరం వినబడక మూగబోయెనా

వీచే చల్లని చిరుగాలి నను తాకకనే వీగిపోయె
చెలి అందెల సవ్వడి తన వెంబడి లేకపోయెననా

వెన్నెల రారాజు నల్లని మబ్బుల మాటున దాగెపోయె
చెలి గుండె లోతున చీకటి మేఘం కన్నుల చాటున వర్షించెననా

ఎగసి పడే సాగర కెరటం అలలై పొంగలేదే
చెలి మదిలో తాపం కలల తీరం చేరలేదనా

-మీ చిట్టి, పండు